مىيحۋا قۇرمانقان قىزى
ساعىنىش ءورىپ سانامنان
انامنىڭ جۇرتى
انامنىڭ جۇرتى ارايلى ماعان اسپانى،
بال شاربات اناۋ شىمىرلاپ جاتقان باستاۋى.
انامىز سودان شەلەگىن مالىپ سۋ العان
سىڭعىرلاپ شولپى، جاراسىم تاۋىپ شاش باۋى.
انامنىڭ جۇرتى ساعىنتار ءار كەز اسىلىم،
جىيەنى بولىپ سول جەردە شالقىپ تاسىدىم.
ناشاعى اپام جىيەنگە جىيىپ ءدامدىسىن
ناعاشى اعام سىيلاعان تالاي اسىعىن.
انامنىڭ جۇرتى تىم ىستىق بولىپ تۇراتىن،
ناشاشى اتام پەيىلىن ماعان بۇراتىن.
اۋلە بولىپ كەتۋشى ەدىم ەرلەنىپ.
مىنىپ اپ شىركىن اتامنىڭ جۋاس قۇلا اتىن.
تاڭى دا ماعان ەرەكشە بولىپ اتاتىن،
كۇنىدە ەرەك مەيىرمەن ساۋلە شاشاتىن.
قارتتارى كەلىپ باسىمنان سىيپاپ ايمالاپ،
جىيەنىمىز دەپ كوزىمنەن تانىپ جاتاتىن.
ناعاشى جۇرتىم انامنىڭ بالا تۇراعى،
شاقىرات مەنى بۇلبۇلى، بالا قۇراعى.
ناعاشى دەگەن بايتەرەك قانداي قادىرلى
كوڭىلىپ ىلعي بارعىسى كەلىپ تۇرادى.
ەرتىسىم
ەرتىسىم بالالىعىم قالعان مەكەن،
تالايعا قول جەتپەتىن ارمان مەكەن.
بالىعى تايداي تۋلاپ اسىر سالىپ،
قۇستارى ءتاتى انىنە سالعان مەكەن.
ەرتىسىم بۇگىن ماعان ارمان مەكەن،
وزىڭسىز باعىم مەنىڭ جانعان بەكەن.
انا وزەن تۇنىعىڭنان قانىپ ءشىپ،
تاڭدايدا كاۋسار ءدامى قالعان مەكەن.
ەرتىسىم كىندىك قانىم تامعان مەكەن،
تاريحقا اتى قالعان تارلان مەكەن.
ەرتىسىم دۇنىيەگە كوز تاستاتىپ،
ەڭ العاش قۇشاعىنا العان مەكەن.
ەرتىسىم ويىن كۇلكىم قانعان مەكەن،
ساناما ءبىلىم شامى جانعان ەكەن.
اتامنىڭ قاسقا اتىنا مىگەسىپ اپ،
ەڭ العاش مەكتەبىمە بارعان مەكەن.
ىزدەرىم جاعاڭداعى قالدى مەكەن،
بالا دوس تاس تەرۋگە باردى مەكەن،
بالىقشى اعالارىم بالاق تۇرىپ،
قايىقتا شامشى ءانىن سالدى مەكەن.
گۇلدەرىڭ قاۋاشاعنىن جاردى مەكەن،
قۇمدارىڭ تاڭداي تاڭبا سالدى مەكەن،
قۇرداسىم قارا بورباي ازامات بوپ،
ماعان ارناپ اققايران الدى مەكەن.
ەرتىسىم سالىيقالى ءساندى مەكەن،
قۇستارى ساۋىق قۇرعان ءاندى مەكەن.
قوينىنان ارمان قۋىپ الىستاپ ەم،
قۇت مەكەن بەيتانىس بوپ قالدى مەكەن.
قۇيىپ تۇر جاڭبىر
قۇيىپ تۇر جاڭبىر، ناجاعاي وتى جارقىلداپ،
قۇت جاڭبىر مەنەن تابىسى ەلدىڭ ارتىلماق.
ويان دەپ ماعان ويسالىپ تۇرعان سەكىلدى،
تەرەزەمدى ۇردى تامشىلار كەلىپ تارسىلداپ.
قۇيىپ تۇر جاڭبىر، اۋاسىن جەردىڭ تازارتىپ،
بوز قىستى قۋدى اۋىلدان الىس بوزارتىپ.
كەلدى دەپ كوكتەم اقجاۋىن شاشۋ شاشۋدا،
قۇستاردا كەلەر قاناتىن قاعىپ، ناز ارتىپ.
قۇيىپ تۇر جاڭبىر، تاۋلاردىڭ جۋىپ تۇلعاسىن،
قۋالاپ بارات سەل سۋى ساي مەن جىلعاسىن.
قۇيا بەر جاڭبىر، قۇيا بەر جاڭبىر سىركىرە،
وزەندەر ءورشىپ، تولقىنى تايداي تۋلاسىن.
قۇيا بەر جاڭبىر دالامدى تازا جۋىندىر،
كوڭىلدەر اناۋ ارشىلسىن ايتەۋ بۇلىڭعىر.
و! اق جاۋىن قۇت بولىپ قۇيىل ەلىمە ،
كىسىنەپ جاتىر جۇرەكتە سەن دەپ قۇلىن جىر.
انام مەنىڭ...
انام مەنىڭ قاسىيەتتى مۇعالىم ،
ءار سوزىنەن ادالدىقتى ۇعامىن.
جىر ارناۋعا بورىشتىمىن وزڭە،
سان ۇرپاققا جاقتىڭ ءبىلىم شىراعىن.
انام مەنىڭ قاسىيەتتى مۇعالىم،
بىزگە سىڭگەن ۇجداعاتتى مۇرالىڭ.
ءوزىڭ بەرگەن ءبىلىم نارىن تۋ قىلىپ،
بىيكتەردەن بىيىكتەرگە شىعامىن.
انام مەنىڭ ۇلاعاتتى مۇعالىم،
ۇرپاق بولدى ارمانىڭ مەن ۇرانىڭ.
اياۋلى انا الاڭسىز بول ءاماندا ،
ارلى قىز بوپ ىزگىلىكتى قۋامىن.
التايىم
التىن بەسىك، ارايلى نۇرىن توككەن التايىم،
جەر جاناتتى، جايناعان كۇنىڭ كوكتەن التايىم.
قىراندارى قىراعى ، ۇنى وكتەم التايىم،
سامال جەلى ساعىنىش وبەر بەتەن التايىم.
ارمانىمنىڭ اق تاڭى الاۋلاعان التايىم،
اسقارتاۋى بۇلدىراپ ماناۋراعان التايىم.
ۇل قىزدارى جۇرەكتەن جىر ارناعان التايىم،
ۇرپاعىنا ۇلاعات سي ارناعان التايىم.
قۇستار ۇنى دالاڭا كورىك بەرگەن التايىم،
شابىتىما شالقىعىان ەرىك بەرگەن التايىم.
توڭىرەككە ماشقۇر بوپ تامساندىرعان التاىيم،
الىس كەتسەن ساعىنتىپ ءان سالدىران التايىم.
اياۋلى اعا
اعا دەسە اقتارامىن سىرىمدى،
ۇمىتتىڭ با؟ ارناپ جازعان جىرىمدى.
اقىلدى دا اسىلىمسىڭ دەۋشى ەدىڭ،
سىيپاپ مەنىڭ ماڭدايىمدى، بۇرىمدى.
اعام بولدىڭ، قورعان بولدىڭ داۋىلدا،
تاسالادىم توڭعان كەزدە جاۋىنعا.
كەشە عانا سەكىلدەنەت كەشكەنىم،
بوتا تىرسەك بالا كەزىم اۋىلدا.
ونەر دەسە الدا جۇردىڭ اتويلاپ،
تۇلپارىڭنىڭ تۇياعىنان وت ويناپ.
ازامات بوپ تانىلدىڭ سەن ەلىڭە،
اۋىل قامىن، باۋىر قامىن ەرتە ويلاپ.
جان سەرىگىڭ قادىر تۇتام جەڭگەمدى،
ول دا ماعان كوڭىلىن شىن بولگەندى.
ارى تازا بۇلاق سۋى سەكىلدى،
تەكتى اتانىڭ بالاسى ەدى كورگەندى.
جۇرۋشى ەدىڭ مەنى اعا جەتەلەم،
تومپاڭ قاعىپ ەرۋشى ەدىم ەركەلەپ.
سەن بىلىمگە قۇشتار بولدىڭ جاسىڭنان،
مەندە وزىڭنەن تالىم الدىم ەنتەلەپ.
بىرگە تۋدىق ءبىلىم بەرگەن انادان،
ءوزىڭدى ويلاپ جولىڭا سان قاراعام.
قورمانىم بوپ قورعانىم بوپ جاساي بەر،
جانى جايساڭ جۇرەگى نۇر جان اعام.
جان ۇيادا...
جان ۇيادا جارىڭ بولسا قورعانىڭ،
تىياناقتار تىرلىكتەگى قورمالىڭ.
جابىققاندا پانا بولار سايالار
جان جارىڭىز قاسىيەتتى ورمانىڭ.
جان ۇيادا بالاڭ بولسا بازارىڭ،
بولەنەدى بەرەكەگە ناز ءانىڭ.
ورپاعىڭمەن ورتاڭ تولىپ ورىنىعىپ،
باسقا جاققا بولىنبەيدى نازارىڭ.
جان ۇيادا بولسا شاتتىق كۇلكىڭىز،
اشىلمايدى وندا قايعى قۇلپىڭىز.
بەرەكەمەن ۇي ۇستاساڭ اعاىيىن،
قويىڭ قوزداپ، قۇلىندايدى جىلقىڭىز.
بەرەكەمەن تاراپ ات پەن اتاعى ،
جان ۇيا بول يمان قونعان باتالى.
مەيمانىڭا جاي داستارقان كول كوسىر،
قوناقپەنەن قىدىر دارىپ جاتادى.
بەرمەسە
اناڭىز اق سۇت بەرمەسە،
قاباقتى قايعى تورلايدى.
اتاڭىز اقىل بەرمەسە،
ساناڭا ساۋلە قونبايدى.
اقىنعا شابىت بەرمەسە،
جۇرەكتەن تولقىپ جىر تۋماس.
ەڭبەگىڭ جەمىس بەرمەسە،
بايلىققا تولى كۇن تۋماس.
بابالار باتا بەرمەسە،
ازىنعان ۇرپاق وڭار ما؟
جۇرەككە يمان كەلمەسە،
جانىڭا تاۋبا قونارما؟
ۇستازدار ءبىلىم بەرمەسە،
عىلىمنىڭ سىرى جۇعارما؟
قارتتارىم كەڭەس بەرمەسە،
قىران بوپ ۇرپاق شىعارما؟
دوستارىڭ كوڭىل بەرمەسە،
دۇسپانىڭ قاشىپ بۇعارما؟
جوسپاردىڭ جونى كەلمەسە،
ارمانىڭ جولدا تىناردا.
زامانىڭ وراي بەرمەسە،
تىلەكتىڭ جولى بولارما؟
ءساتى ءبىر جولاي كەلمەسە،
قولىڭا شاتتىق قونارما؟
جاراتقان ناپسى بەرمەسە،
بايلىققا كوزىڭ تويارما؟
وزبىرعا ىنساپ بەرمەسە،
جەگەنىن سىرا قويارما.
قىلمىسقا جازا بەرمەسە،
زامانىڭ تىنىش بولاما؟
ايتقىزباي اجال كەلمەسە،
شولمەگىڭ مىڭ كۇن سىناما.
شالعاي جۇرىپ...
جىيى- جىيى تەلەفوندا تىلدەسىپ،
جۇرەيىكشى جۇرەكتەرمەن جۇزدەسىپ.
اعايىندار شالعاي جۇرىپ ساعىندىم،
ءىز سۋىتپاي كەلىپ تۇرشى ىزدەسىپ.
جۇرەكتەردە ساعىنىشتان شوق تاسىپ،
شالعاي كەتتىىم دوستارمەنەن قوشتاسىپ.
ەمىرەنە باس قوسساق ءبىر شىركىن- اۋ،
شۇرقىراسىپ، تۋعان ەلدە توپتاسىپ.
شالعاي جۇرىپ سەندەردى ويلاپ جۇرەمىن،
وزدەرىڭ دەپ لوپىلدەيدى جۇرەگىم.
تىرلىك دەيتىن تارپاڭ اتتان تۇسە الماي،
قاۋىشىۋعا وراي تاپپاي جۇدەدىم.
كوڭىل شىركىن كوك وزەندەي تولقىيدى،
« ساعىنىش» دەپ قايتالايدى سول كۇيدى.
اۋىل جاقتان حابار الىپ كەلدى مە؟
جاز سامالى قۇلاڭ شاشتى جەلپىيدى.
كۇندەر قالدى باس قوساتىن كوڭىلدى،
وزدەرىڭ دەپ كوڭىل تالاي بولىندى.
شىركىن شىركىن بىر قۇدىرەت بولسا ەگەر،
ارتقا قايتا شەگەرەر ەم ءومىردى.
كورىكتى
ءتورت تۇلىگى مىڭعىرعان جەر كورىكتى،
ىنتىماعى جاراسقان ەل كورىكتى.
قاراقات، قىزىلقاتى تامساندىرىپ
بۇلدىرگەنى جايقالعان بەل كورىكتى.
ەڭبەگىمەن ەرشىمدى ەر كورىكتى،
سامالىمەن ايمالار جەل كورىكتى.
اسپانداعى التىناي تامساناتىن
اققۋ قازى تارانعان كول كورىكتى،
قاراعايلى، قاتپارلى تاۋ كورىكتى،
بۇلبۇل قۇسى سايراعان باۋ كورىكتى.
اق الماستاي اينىماس ار كورىكتى،
جانى سۇلۋ جايدارمان جار كورىكتى.
كوكتەمدەگى جايقالعان گۇل كورىكتى،
جارپشىققان جۇرەكتەن جىر كورىكتى،
ار ۇجدانىن ساقتاعان قىز كورىكتى،
اتا سالتىن جاتتاعان ۇل كورىكتى.
بالىق باۋىر اتاتىن تاڭ كورىكتى،
بۇلا قىزداي بۇرالعان تال كورىكتى،
مىڭ بۇرالعان بۇلاقتاي ءبي كورىكتى،
جۇرەكتەردەن جول تابار ءان كورىكتى.
加载评论内容,请稍等......