شاڭحاي سەلبەستىك ۇيىمىنا مۇشە ەلدەردىڭ جاۋاپتى ورگانىنا قاراستى شەكارا قورعانىس تاراۋلارى«تيانشان − 3 (2017)» لاڭكەستىككە قارسى تۇرۋ بىرىككەن مانەۆرىن وتكىزدى
ءتىلشىمىز ياڭ شۋحان 27 - ماۋسىمدا اتۇشتان حابارلايدى. 27 - ماۋسىم كۇنى تۇستەن بۇرىن ساعات 11دەن 30 مينۋت وتكەندە، شارتتى ءنومىرى «تيانشان − 3 (2017)» بولعان شاڭحاي سەلبەستىك ۇيىمىنا مۇشە ەلدەردىڭ جاۋاپتى ورگانىنا قاراستى جۇڭگو - قىرعىزستان شەكارا قورعانىس تاراۋلارىنىڭ لاڭكەستىككە قارسى تۇرۋ بىرىككەن مانەۆرى جۇڭگو - قىرعىزستان ەكى ەلدىڭ شەكاراسىندا باستالدى. ەكى ەلدىڭ شەكارا قورعانىس تاراۋلارى «ناقتى جەر، شىن اسكەر، شىن قارۋ - جاراق، شىن وق، شىن جارىلىس جاساۋ» تاسىلدەرى ارقىلى مانەۆر مازمۇنىنان ەلىكتەمەلى توسقاۋىلدارعا دەيىن «شىن سوعىسپەن» تىعىز بىرلەستىرىپ، جۇڭگو مەن قىرعىزستاننىڭ اسكەر كۇشىن ورنالاستىرۋ، يكەمدى شايقاس جۇرگىزۋ، بىرلەسىپ قولباسشىلىق ەتۋ، سەلبەسە سايكەسۋ، زورلىقتى كۇش، لاڭكەستىك ارەكەتتەرىنە بىرگە سوققى بەرۋ جاقتارىندا قول جەتكىزگەن كورنەكتى ناتيجەلەرىن جان - جاقتى تەكسەرىپ - وتكىزىپ الدى. وسى رەتكى مانەۆر «تيانشان − 1 (2006)» جانە «تيانشان − 2 (2011)» لاڭكەستىككە قارسى تۇرۋ بىرىككەن مانەۆرىنەن كەيىنگى ەلىمىزدىڭ شاڭحاي سەلبەستىك ۇيىمى جۇلگەسىندە وتكىزگەن زاڭ اتقارۋ حاۋىپسىزدىك ورگاندارىنىڭ تاعى ءبىر رەتكى بىرىككەن مانەۆرى.
مانەۆردە ءبىر توپ زورلىقتى كۇش لاڭكەستەرى جۇڭگو - قىرعىزستان شەكاراسىنىڭ قىرعىزستان جاعىنداعى بەلگىلى وڭىرگە كىرىپ، قارۋ - جاراقتى جۇڭگو شەكاراسىنا تاسىمالداۋعا ۇرىنىپ، زورلىقتى كۇش، لاڭكەستىك اركەتىن ۇيىمداستىرىپ اتقارۋدى ماقسات ەتەدى، شابۋىلعا قارسى ارەكەت، بىرىككەن قولباسشىلىق ءبولىمىنىڭ ارەكەتى، لاڭكەستىك لاگەرىن تازالاۋ ارەكەتى سىندى 3 تاقىرىپ، كەدەننەن جانە تاۋ اۋزى وتكەلىنەن قۋعىنداۋ، شەكارا قورعانىس ساقشى بولىمشەسى نەمەسە مىندەت اتقارۋ ءتۇيىنى قارسى شابۋىل جاساۋ، تاۋلى جەردە تۇتقىنداۋ - قۇرتۋ شايقاسى سياقتى شىن اسكەرلەردىڭ 15 مانەۆر ءدارىسى ورنالاستىرىلدى.
ۇعىسۋعا قاراعاندا، ەكى جاقتىڭ مانەۆرگە قاتىسقان اسكەري ءبولىمى جالپى 700 اسكەر كۇشىن شىعارىپ، جۇڭگو - قىرعىزستان شەكارا قورعانىس 3 - دارەجەلى ۋاكىلدىك بايلانىس تۇزىمىنە سۇيەنىپ، لاڭكەستىككە قارسى تۇرۋ بىرىككەن قولباسشىلىق ءتۇزىمىن اتقارىپ، لاڭكەستىك شابۋىلداۋ ارەكەتتەرىن ءساتتى ءبىر جاقتى ەتىپ، بارلىق لاڭكەس كۇماندىلارىن بىرلەسىپ الاستاپ، قارۋ - جاراق، وق - دارىلەردەن قىرۋارىن قولعا ءتۇسىرىپ، جۇڭگو - قىرعىزستان ەكى ەل شەكارا قورعانىس تاراۋلارىنىڭ شەكارانى، وتكەلدى باسقارۋ - مەڭگەرۋ قۋاتى مەن لاڭكەستىك ارەكەتتەرگە بىرلەسىپ سوققى بەرۋدەگى سەنىمىن، شاراسىن جان - جاقتى ايگىلەپ، لاڭكەستەرگە توتەنشە سەس كورسەتكەن.
مانەۆر اقىرلاسقان سوڭ، جۇڭگو قوعام حاۋىپسىزدىگى مينيسترىنىڭ كومەكشىسى ۋاڭ جيان بىلاي دەدى: بۇكىل مانەۆردىڭ ۇيىمداستىرىلۋى تىڭعىلىقتى، قولباسشىلىق ەتۋى پارمەندى، سوعىس تاكتيكاسى ءدال، تەحنيكالىق قابىلەتى كەمەلدى بولىپ، جۇڭگو - قىرعىزستان ەكى ەلدىڭ لاڭكەستىككە بىرلەسىپ قارسى تۇرۋداعى، سەلبەسە شايقاس جۇرگىزۋدەگى شىنايى سوعىس جۇرگىزۋ قابىلەتى مەن ەكى ەل شەكارا قورعانىسى زاڭ اتقارۋىنداعى سەلبەستىكتىڭ ەرەن دەڭگەيىن ايگىلەپ، شاڭحاي سەلبەستىك ۇيىمىنا مۇشە ەلدەردىڭ بولشەكتەۋشىلىككە، ۇشقارىلىققا، لاڭكەستىككە سوققى بەرۋدەگى وسكەلەڭ بىركەلكى تۇرعىسى مەن بەكىمىن تولىق بەينەلەدى، بۇل شاڭحاي سەلبەستىك ۇيىمىنا مۇشە ەلدەر حاۋىپسىزدىك تاراۋلارى اراسىنداعى اۋىس - كۇيىس سەلبەستىكتى اناعۇرلىم جوعارى دەڭگەيكە كوتەرىپ، زاڭ اتقارۋداعى حالىقارالىق سەلبەستىكتى كۇشەيتۋدە، زورلىقتى كۇش، لاڭكەستىك قىلمىستارىنا بىرگە سوققى بەرۋدە، وڭىرلەر ارا حاۋىپسىزدىكتى، ورنىقتىلىقتى قورعاۋدا بەلسەندى ىلگەرىلەتۋ رولىن اتقاراتىندىعى داۋسىز.
مانەۆرگە قولباسشىلىق ەتۋ ءبولىمىنىڭ قىرعىزستان جاق قولباسشىسى، قىرعىزستان شەكارا قورعانىس باس مەكەمەسى شەكارا قورعاۋ مەكەمەسىنىڭ باستىعى پولكوۆنيك تۇرعانبايەۆ نۇربەك بىلاي دەدى: مانەۆر وتە ءساتتى ءوتتى، دەڭگەيى دە جوعارى بولدى. جۇڭگو - قىرعىزستان 2014 - جىلى تاتۋ - ءتاتتى اسكەري ءبولىمدى بىرگە قۇرۋ قيمىلىن باستاعاننان بەرى، بىرلەسىپ زاڭ اتقارۋ قيمىلدارى دا ۇدايى ورىستەتىلىپ كەلەدى، مۇنىڭ ءبارى لاڭكەستىككە قارسى تۇرۋ سەلبەستىگىنە ءتيىمدى.
شاڭحاي سەلبەستىك ۇيىمى لاڭكەستىككە قارسى قۇرىلىمى القالار كەڭەسىنىڭ قاۋلىسىنا ساي، قازاقستان، جۇڭگو، قىرعىزستان، رەسەي، تاجىكستان، وزبەكستان سىندى 6 مۇشە ەلدىڭ شەكارا قورعانىس تاراۋلارىنىڭ ۋاكىلدەرى، شاڭحاي سەلبەستىك ۇيىمى وڭىرلىك لاڭكەستىككە قارسى قۇرىلىمى اتقارۋشى كوميتەتىنىڭ ۋاكىلى، جۇڭگو قوعام حاۋىپسىزدىگى مينيسترلىگى، شينجياڭ ۇيعۇر اۆتونوميالى رايوننىڭ قاتىستى باسشىلارى، سونداي - اق جۇڭگونىڭ قاتىستى ەلدەردە جانە قۇرىلىمدارىندا تۇراتىن ساقشى ىستەرى بويىنشا بايلانىس جاساۋشىلارى، تۇراقتى ۋاكىلدەرى مانەۆردى كوزدەن كەشىردى.
كەلۋ قاينارى : شينجياڭ گازەتىنەن
加载评论内容,请稍等......