شي جينپيڭ بريكس ەلدەرى سىرتقى ىستەر مينيسترلەرى كەڭەسىنە كەلگەن شەتەل ۋاكىلدەر ۇيىرمەسىنىڭ باستىقتارىمەن توپتىق كەزدەستى

شينحۋا اگەنتتىگىنىڭ 19 - ماۋسىمدا بەيجيڭنەن بەرگەن حابارى. مەملەكەت ءتوراعاسى شي جينپيڭ 19 - ماۋسىمدا حالىق سارايىندا بريكس ەلدەرى سىرتقى ىستەر مينيسترلەرى كەڭەسىنە قاتىناسۋ ءۇشىن جۇڭگوعا كەلگەن رەسەيدىڭ سىرتقى ىستەر مينيسترى لاۆروۆپەن، وڭتۇستىك افريكانىڭ سىرتقى ىستەر مينيسترى ماشابانەمەن، برازيليانىڭ سىرتقى ىستەر مينيسترى نۋنەسپەن، ءۇندىستاننىڭ سىرتقى ىستەر مينيسترى سينگەرمەن توپتىق كەزدەستى.

شي جينپيڭ بريكس ەلدەرى سىرتقى ىستەر مينيسترلەرى كەڭەسىنىڭ تابىستى وتكىزىلگەندىگىن قۇتتىقتاپ، ولاردىڭ جۇڭگونىڭ بريكس ەلدەرىنىڭ ءتوراعا ەلى بولۋ مىندەتىن اتقارعانىن قولداعانىنا العىس ايتتى. شي جينپيڭ مىنالاردى اتاپ كورسەتتى: قازىرگى قۇبىلمالى حالىقارالىق جاعدايدا، بريكس ەلدەرى ورتاق مىندەتكە ءدوپ كەلىپ وتىر، ءار ەل ءوز ەلدەرىنىڭ ورنىقتىلىعى مەن دامۋىن ويداعىداي قورعاپ، ءتيىمدى حالىقارالىق ورتا قالىپتاستىرىپ، حالىقارالىق ءتارتىپتىڭ اناعۇرلىم ءادىل، ۇيلەسىمدى باعىتقا قاراي دامۋىن ىلگەرىلەتۋى كەرەك. 

بريكس ەلدەرىنىڭ سەلبەستىگى − ءبىر جاسامپازدىق، ول ساياسي جانە اسكەري جاقتا وداقتاساتىن ەسكى قالىپتان اسىپ ءتۇسىپ، وداق جاساسپاي، سەرىك عانا بولاتىن جاڭا قاتىناس ورناتتى؛ ول يدەولوگيالىق شەكتەمەدەگى كونە ويلاۋ ءتاسىلىن بۇزىپ، ءوزارا قۇرمەت ەتەتىن، بىرگە العا باساتىن جاڭاشا جولعا قادام تاستادى؛ ول ءبىرى مەن ءبىرى باسەكەلەسەتىن، جەڭگەنى بارىنە يە بولاتىن كونە يدەيانى بۇزىپ، ءوزارا تيىمدىلىك جاساپ، سەلبەسىپ، ورتاق يگىلىككە كەنەلۋدى كوزدەيتىن جاڭا تانىمدى امالياتتا ايگىلەدى. بريكس ەلدەرىنىڭ سەلبەستىك مەحانيزمى 5 ەلدىڭ ناقتى قاجەتىنە ۇيلەسۋمەن بىرگە، تاريحتىڭ دامۋ بەتالىسىنا دا سايكەسەدى.

شي جينپيڭ بىلاي دەپ باسا دارىپتەدى: بريكس ەلدەرىنىڭ سەلبەستىك مەحانيزمى 10 جىلدى باستان وتكەردى، بريكس ەلدەرىنىڭ دامۋ سىندى وسى نەگىزگى جەلىنى مىقتاپ ارقاۋ ەتۋى، 5 ەلدىڭ حالىقتارىنا باقىت اپەرۋمەن بىرگە، دۇنيە جۇزىندەگى ەلدەردىڭ كيەر كيىم، ىشەر اس، حاۋىپسىزدىك سياقتى ماسەلەلەردى تۇبەگەيلى شەشۋىنە تاماشا جول ازىرلەپ بەردى. بريكس ەلدەرى − مۇددەلەس، تاعدىرلاس ورتاق تۇلعا. بيىل بريكس ەلدەرى سەلبەستىك مەحانيزمىنىڭ ەكىنشى 10 جىلى باستالدى، ءبىز بريكس ەلدەرىنىڭ سەلبەسىپ، ورتاق يگىلىككە كەنەلۋ رۋحىن ساۋلەلەندىرىپ، بىرگە اقىلداسۋ، بىرگە قۇرۋ، بىرگە يگىلىكتەنۋ تانىمىنان جازباي، دامۋ تۋىن ۇزدىكسىز بيىك كوتەرىپ، كوپ جاقتىلىق پرينسيپ پەن حالىقارالىق قارىم - قاتىناستىڭ نەگىزگى ولشەمىنە قاتاڭ بويسۇنۋىمىز كەرەك. كوپشىلىك تەك ءبىر نيەت، ءبىر ماقساتپەن جۇمىلا كۇش شىعارسا، بريكس ەلدەرىنىڭ سەلبەستىگى، ءسوز جوق، گۇلدەنىپ، ماۋەلەپ، ەكىنشى 10 جىلدىق التىن ءداۋىردى قارسى الادى.

ءار ەلدىڭ ۋاكىلدەر ۇيىرمەسىنىڭ باستىقتارى ءبىر اۋىزدان بىلاي دەدى: جۇڭگونىڭ بريكس ەلدەرىنىڭ كەزەكتى ءتوراعا ەلى بولۋ تۇرعىسىندا بريكس ەلدەرىنىڭ سەلبەستىگىن ىلگەرىلەتۋ جاعىندا قىرۋار قىزمەت ىستەگەنىنە العىس ايتامىز. بريكس ەلدەرى − جاڭادان گۇلدەنگەن جانە دامۋ بولاشاعى جارقىن مەحانيزم. جاڭا جاعدايدا، بريكس ەلدەرى ءوزارا تىعىز سايكەسىپ جانە سەلبەستىك ورناتىپ، الەمدىك ءتۇرلى سىن - سايىستارعا بىرگە توتەپ بەرۋدى قاجەت ەتەدى. جۇڭگو سىندى ءتوراعا ەلدىڭ جەتەكشىلىگىندە، بريكس ەلدەرىنىڭ سەلبەستىگى 5 ەلدىڭ حالقىنا ءتىپتى مول باقىت - بايلىق جاراتىپ، بريكس ەلدەرىنىڭ ورنى مەن حالىقاراداعى ىقپالىن كۇشەيتەتىندىگىنە سەنەمىز. ءار ەل ءتوراعا ەل بولعان جۇڭگونىڭ بريكس ەلدەرىنىڭ سەلبەستىگىن ىشكەرىلەي ىلگەرىلەتۋىنە سايكەسىپ، جۇڭگو جاقتىڭ بريكس ەلدەرى باسشىلارىنىڭ شيامىن كەڭەسىن ءساتتى وتكىزۋىنە قولداۋ كورسەتۋگە پەيىل تانىتتى.

مەملەكەتتىك كەڭەستىڭ مۇشەسى ياڭ جيەچى كەزدەسۋدە بىرگە بولدى.

كەلۋ قاينارى : شينجياڭ گازەتىنەن