ج ك پ ورتالىق كوميتەتى، مەملەكەتتىك كەڭەس«جاڭا داۋىردەگى ونەركاسىپ جۇمىسشىلارى قوسىنى قۇرىلىسىنا رەفورما جاساۋ جوباسىن» باسىپ تاراتتى

شينحۋا اگەنتتىگىنىڭ 19 - ماۋسىمدا بەيجيڭنەن بەرگەن حابارى. ج ك پ ورتالىق كوميتەتى، مەملەكەتتىك كەڭەس تاياۋدا «جاڭا داۋىردەگى ونەركاسىپ جۇمىسشىلارى قوسىنى قۇرىلىسىنا رەفورما جاساۋ جوباسىن» (قىسقاشا «رەفورما جوباسى» دەلىنەدى) باسىپ تاراتتى، سونداي - اق ۇقتىرۋ شىعارىپ، جەر - جەردەن، تاراۋلاردان ءىس جۇزىندىك جاعدايمەن ۇشتاستىرىپ، مۇقيات دايەكتىلەندىرۋدى، تياناقتاندىرۋدى تالاپ ەتتى.

«رەفورما جوباسىندا» مىنالار ايقىن العا قويىلدى: ونەركاسىپ جۇمىسشىلارى قوسىنى قۇرىلىسىن عىلىم - تەحنيكا، وقۋ - اعارتۋمەن مەملەكەتتى كوركەيتۋ ستراتەگياسىن، دارىندىلار ارقىلى مەملەكەتتى قۇدىرەتتەندىرۋ ستراتەگياسىن، دامۋعا جاڭالىق اشۋ ارقىلى دەم بەرۋ ستراتەگياسىن اتقارۋدىڭ ماڭىزدى تىرەگى جانە نەگىزدىك كەپىلى ەتىپ، ونى مەملەكەتتىڭ جانە جەرگىلىكتى ورىننىڭ ەكونوميكالىق، قوعامدىق دامۋ جوباسىنا ەنگىزىپ، مۇراتتى، سەنىمدى، تەحنيكا يگەرگەن، جاڭالىق اشا الاتىن، باتىلدىقپەن جاۋاپكەرلىك ارقالايتىن، ۇلەس قوسۋدى دارىپتەيتىن ونەركاسىپ جۇمىسشىلارىنىڭ الىپ قوسىنىن قۇرۋ كەرەك.

پارتيا ورتالىق كوميتەتى ونەركاسىپ جۇمىسشىلارى قوسىنى قۇرىلىسىنا ەجەلدەن وسكەلەڭ ءمان بەرىپ كەلەدى، اسىرەسە، پارتيا 18 - قۇرىلتايىنان بەرى، باس شۋجي شي جينپيڭ پارتيا مەن مەملەكەت قىزمەتى جالپى جاعدايىنىڭ ستراتەگيالىق تۇرعىسىنان ونەركاسىپ جۇمىسشىلارى قوسىنى قۇرىلىسى جونىندە ءبىرسىپىرا ماڭىزدى بايىمداۋلار جاساپ، ايقىن تالاپ قويىپ، جاڭا داۋىردەگى ونەركاسىپ جۇمىسشىلارى قوسىنى قۇرىلىسىنا رەفورما جاساۋ جونىندەگى جالپى تۇلعالىق وي جەلىنى جانە جۇيەلى جوبانى ورتاعا قويىپ، جاڭا داۋىردەگى ونەركاسىپ جۇمىسشىلارى قوسىنى قۇرىلىسىنا رەفورما جاساۋدى ىلگەرىلەتۋگە نەگىزگى ولشەم جانە ارەكەت قىبلاناماسىن كورسەتىپ بەردى. 2017 - جىلى 6 - اقپاندا باس شۋجي شي جينپيڭ ورتالىقتىڭ رەفورمانى جاپپاي تەرەڭدەتۋگە باسشىلىق ەتۋ گرۋپپاسىنىڭ 32 - رەتكى ءماجىلىسىن باسقارىپ اشتى، ءماجىلىس «رەفورما جوباسىن» قاراپ ماقۇلدادى. «رەفورما جوباسىندا» جاڭا داۋىردەگى ونەركاسىپ جۇمىسشىلارى قوسىنى قۇرىلىسىنا رەفورما جاساۋدىڭ جەتەكشى يدەياسى، نەگىزگى پرينسيبى، نىساناسى مەن مىندەتتەرى جانە رەفورما شارالارى ايقىندالىپ، نە ءۇشىن رەفورما جاساۋ، قالاي رەفورما جاساۋ، قانداي جول باسۋ، قانداي نىساناعا جەتۋ سياقتى ءبىرسىپىرا كەلەلى ماسەلەلەر ايقىندالدى. 

«رەفورما جوباسىندا» مىنالار باسا دارىپتەلدى: ونەركاسىپ جۇمىسشىلارى جۇمىسشى تابى اراسىندا تىرەكتىلىك رول اتقاراتىن نەگىزگى كۇش، قوعامدىق بايلىق جاراتاتىن پارمەندى كۇش، دامۋعا جاڭالىق اشۋ ارقىلى دەم بەرەتىن تىرەكتى كۇش، قۇدىرەتتى مەملەكەت قۇرۋ ستراتەگياسىن اتقاراتىن جالىندى كۇش. ساياسي جاقتان قامتاماسىزداندىرۋ، ءتۇزىم جاعىندا تياناقتاندىرۋ، ساپانى جوعارىلاتۋ، ۇقىق - مۇددەنى قورعاۋ جالپى وي جەلىسى بويىنشا، ونەركاسىپ جۇمىسشىلارى قوسىنى قۇرىلىسىنىڭ تالابىنا ۇيلەسپەيتىن تۇزىلىسكە، مەحانيزمگە رەفورما جاساپ، قالىڭ ونەركاسىپ جۇمىسشىلارىنىڭ بەلسەندىلىگىن، ىرىقتىلىعىن، جاسامپازدىعىن تولىق جۇمىلدىرىپ، «قوس 100 جىلدىق» كۇرەس نىساناسىن، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋدا ونەركاسىپ جۇمىسشىلارى قوسىنىنىڭ نەگىزگى قوسىندىق رولىن اناعۇرلىم جاقسى ساۋلەلەندىرۋ كەرەك.

«رەفورما جوباسى» ونەركاسىپ جۇمىسشىلارى قوسىنى قۇرىلىسىنىڭ يدەيالىق، ساياسي قۇرىلىسىن كۇشەيتۋ، ونەركاسىپ جۇمىسشىلارىنىڭ تەحنيكالىق قابىلەتىن ۇشتاۋ جۇيەسىن قۇرۋ، ينتەرنەتتەن پايدالانىپ، ونەركاسىپ جۇمىسشىلارى قوسىنى قۇرىلىسىن جەبەۋ، ونەركاسىپ جۇمىسشىلارىن دامىتۋ ءتۇزىمىن جاڭالاۋ، ونەركاسىپ جۇمىسشىلارى قوسىنى قۇرىلىسىنىڭ تىرەك بولۋ، قامتاماسىزداندىرۋ رولى سياقتى 5 جاقتى ارقاۋ ەتىپ، 25 تارماقتى رەفورما شاراسىن العا قويدى، ول ونەركاسىپ جۇمىسشىلارىن يدەيالىق جاقتان جەتەكتەۋ، ولاردىڭ تەحنيكالىق قابىلەتىن جوعارىلاتۋ، رولىن ساۋلەلەندىرۋ، تىرەك بولۋ، قامتاماسىزداندىرۋ سياقتى جاقتارداعى ءتۇزىلىستى، مەحانيزمدى ءوز ىشىنە الىپ، ونەركاسىپ جۇمىسشىلارى قوسىنى قۇرىلىسىن ىلگەرىلەتۋدى بارىنشا قامتاماسىزداندىردى.

ونەركاسىپ جۇمىسشىلارى قوسىنى قۇرىلىسى رەفورماسىنىڭ تياناقتانىپ، ونىمدىلىك كورسەتۋىنە كەپىلدىك ەتۋ ءۇشىن، «رەفورما جوباسىندا» پارتكومنىڭ ءبىر تۇتاس باسشىلىعىنا تاباندى بولىپ، ونەركاسىپ جۇمىسشىلارى قوسىنى قۇرىلىسى رەفورماسىن بىرگە ىلگەرىلەتەتىن قىزمەت جاعدايىن ورناتىپ، رەفورمانى پارمەندى، ءتارتىپتى ىلگەرىلەتۋ، رەفورما، ۇگىت قىزمەتىن جاقسى ىستەۋ جانە رەفورمانى اتقارۋ جونىندەگى باقىلاۋ - قۋزاۋ، تەكسەرۋ سياقتىلاردى كۇشەيتۋ جونىندە ايقىن تالاپتار قويىلدى.

«رەفورما جوباسىن» جاساۋدا جانە اتقارۋدا، ونەركاسىپ جۇمىسشىلارى قوسىنى قۇرىلىسى رەفورماسى جونىندە ارناۋلى جوبا جانە ورنالاستىرۋ جاسالدى، بۇل پارتيامىز بەن مەملەكەتىمىز تاريحىندا العاش رەت جۇرگىزىلىپ وتىر، ول شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ ونەركاسىپ جۇمىسشىلارىن ءوز ىشىنە العان جۇمىسشى تابىنا وسكەلەڭ ءمان بەرگەندىگىن جانە ولارعا شىنايى قامقورلىق جاساعاندىعىن تولىق ايگىلەدى، پارتيا ورتالىق كوميتەتىنىڭ حالىقتى وزەك ەتكەن دامۋ يدەياسىنا جانە بۇكىل ىنتا - پەيىلمەن جۇمىسشى تابىنا سۇيەنۋ باعىتىنا باستان - اياق تاباندى بولۋدىڭ كۇشتى دابىلىن قاقتى، ول پارتيانىڭ بيلىك جۇرگىزۋ نەگىزىن اناعۇرلىم بەكەمدەۋ، مەملەكەتتى قۇدىرەتتەندىرۋ ستراتەگياسىن اتقارۋ، ونەركاسىپ جۇمىسشىلارىنىڭ ساپاسىن جاپپاي جوعارىلاتۋ جونىنەن كەلەلى دە تەرەڭ ءمان الادى.

كەلۋ قاينارى : شينجياڭ گازەتىنەن