جۇڭگو - قازاقستان قارىم - قاتىناسىنا ارمان قاناتىن جالعايىق

شينحۋا اگەنتتىگىنىڭ 7 - ماۋسىمدا بەيجيڭنەن بەرگەن حابارى. 7 - ماۋسىمدا قازاقستانداعى مەملەكەتتىك ساپارى باستالاتىن كۇنى، مەملەكەت ءتوراعاسى شي جينپيڭ «كازاحستانسكايا پراۆدا» گازەتىندە «جۇڭگو - قازاقستان قارىم - قاتىناسىنا ارمان قاناتىن جالعايىق» دەگەن اتپەن اۆتورلى ماقالا جاريالادى. ماقالانىڭ تولىعى:

مامىراجاي ماۋسىم ايى − كۇللى تابيعاتتىڭ وركەندەگەن مەزگىلى. وسى مەرەيلى ماۋسىمدا، نازاربايەۆ زۇڭتۇڭنىڭ شاقىرۋىمەن، مەن قازاقستانعا 3 - رەت ساپارلاي بارامىن ءارى شاڭحاي سەلبەستىك ۇيىمىنىڭ باس قوسۋى مەن استانا مامانداندىرىلعان الەمدىك كورمەسىنىڭ اشىلۋ سالتىنا قاتىناسامىن. قازاقستاننىڭ كەڭ كوسىلگەن كورىكتى دالاسى، مىڭ بۇرالعان اساۋ وزەندەرى، كۇن ساناپ جاڭارعان قۇرىلىستارى، اق كوڭىل، كىشى پەيىل حالقى ماعان تەرەڭ اسەر قالدىردى. وسىناۋ كوركەم ولكەگە تاعى دا جولىم تۇسەر بولعانىنا ىشتەي قاتتى تولقۋلىمىن. 

بيىل جۇڭگو - قازاقستان ديپلوماتيالىق قاتىناسىنىڭ ورناعانىنا 25 جىل تولادى. وسى شيرەك عاسىر ۋاقىتتىڭ ىشىندە، جۇڭگو مەن قازاقستاننىڭ قارىم - قاتىناسى ۋاقىت پەن حالىقارانىڭ الماعايىپ وزگەرىستەرىنىڭ سىناعىنان سۇرىنبەي ءوتتى، تاتۋ كورشىلىك - دوستىق قاتىناس ورناتۋدان جاپپاي ستراتەگيالىق سەرىكتەستىك قاتىناستى دامىتۋعا، ونان مۇددەلەر ورتاقتىعى مەن ورتاق تاعدىر قوعامداستىعىن ورناتقانعا دەيىن، سەكىرمەلى دامۋدى ىسكە اسىرىپ، ەڭ بيىك تاريحي بەلەسكە كوتەرىلدى. 

− جۇڭگو مەن قازاقستاننىڭ ساياسي ءوزارا سەنىمدىلىگى كۇن ساناپ نىعايدى. ەكى مەملەكەت ءبىر - ءبىرىنىڭ تاۋەلسىزدىگىنە، ەگەمەندىگىنە، تەرريتوريالىق تۇتاستىعىنا جانە تاڭداپ العان دامۋ جولىنا قۇرمەت ەتتى، ءبىر - ءبىرىنىڭ باستى مۇددەلەرىنە قاتىستى ماسەلەلەردە ءوزارا تاباندى قولداۋ كورسەتتى، حالىقارالىق جانە وڭىرلىك ماسەلەلەردە تىعىز سايكەسىپ، سەلبەسىپ وتىردى. 

− جۇڭگو مەن قازاقستاننىڭ ناقتى سەلبەستىگى ۇزدىكسىز تەرەڭدەدى. جۇڭگو − قازاقستاننىڭ ەڭ نەگىزگى ساۋدا جانە قارجى قوسۋشى سەرىكتەستەرىنىڭ ءبىرى، جۇڭگونىڭ قازاقستانعا جالپى سالعان قارجىسى 42 ميلليارد 800 ميلليون دوللاردان، بەرگەن نەسيەسى 50 ميلليارد دوللاردان اسادى. 2017 - جىلى قاڭتاردان ساۋىرگە دەيىن، ەكى جاقتى ساۋدانىڭ كولەمى %45.6ءوستى. قازاقستاننىڭ جۇڭگوعا ەكسپورتى ۇزدىكسىز كەڭەيىپ، ۇن، وسىمدىك مايى، سويا بۇرشاق، ەت، بال ونىمدەرى جۇڭگوداعى قاراپايىم بۇقارانىڭ داستارقانىنان ورىن الىپ ۇلگىردى. تاراپتار وندىرىستىك قۋات سالاسىندا 51 سەلبەستىك نىسانىن بەلگىلەدى، بۇل قازاقستاننىڭ ونەركاسىپتەنۋ ۇدەرىسىنە جانە جۇمىس ورىندارىن كوبەيتۋىنە قولداۋ كورسەتۋدە ماڭىزدى ءمان الادى. جۇڭگو - قازاقستان شيكى مۇناي قۇبىرىمەن جۇڭگوعا جالپى 100 ميلليون توننا مۇناي تاسىلدى، جۇڭگو - قازاقستان گاز قۇبىرىمەن جۇڭگوعا جالپى 183 ميلليارد تەكشەمەتر گاز جەتكىزىلدى، تاراپتار يادرولىق ەنەرگەتيكا، جەل ەلەكترى، فوتوۆولتايكا، ت.ب جاڭا ەنەرگيا كوزدەرى بويىنشا سەلبەستىك ورناتتى. ەكى مەملەكەت اراسىندا اپتاسىنا 50 نەشە كەزەكشى ۇشاق ۇشادى. 2016 - جىلى جۇڭگودان قازاقستان شەكاراسى ارقىلى ورتا ەۆروپا باعىتىنا جول تارتقان جۇك پويەزدەرىنىڭ سانى 1200 كەزەكتەن استى، جۇڭگو - قازاقستان تەمىر جولىنىڭ تاسىمال قۋاتى 8 ميلليون 200 مىڭ تونناعا جەتتى، كونتەينەرلەردىڭ تاسىمدالداۋ كولەمى قاۋىرت مولايىپ، 2 ەسەگە ارتتى. بيىل اقپاندا قازاقستاننىڭ ءبيدايى العاش رەت جۇڭگو شەكاراسى ارقىلى وڭتۇستىك شىعىس ازيا ەلدەرىنە ەكسپورتقا شىعارىلدى. 

− جۇڭگو مەن قازاقستاننىڭ گۋمانيتارلىق بايلانىستارى نىعايا ءتۇستى. 2016 - جىلى ەكى مەملەكەت اراسىنداعى كەلىم - كەتىم 500 مىڭ ادام - رەتكە تايادى، قازاقستاننان 14 مىڭ ستۋدەنت جۇڭگودا ءبىلىم الىپ جاتىر. قازاقستاندا قازىرگە دەيىن 5 كۇڭزى ينستيتۋتى جانە 7 كۇڭزى ءدارىسحاناسى اشىلدى، جۇڭگونىڭ جوعارى مەكتەپتەرىنەن 4 قازاقستان ورتالىعى وتاۋ كوتەردى. قازاقستان ءانشىسى ديماش قۇدايبەرگەن جۇڭگودا وتە تانىمال، «ءتىل ۇشىنداعى جۇڭگو»، «ۋىنجوۋ ۇيەلمەنى» سياقتى جۇڭگونىڭ تاڭداۋلى تەلەفيلمدەرى قازاقستانداعى قاراپايىم جۇرتشىلىقتىڭ وتباسىنا جول تارتتى. 

مەن 2013 - جىلى قازاقستانعا العاش رەت ساپارلاي بارعان كەزىمدە، جىبەك جولى ەكونوميكالىق بەلدەۋىن قۇرۋ تۋرالى باستاما كوتەرگەن ەدىم، «ءبىر بەلدەۋ، ءبىر جول» سەلبەستىگى انە سونان باستالدى. 4 جىلدان بەرى «ءبىر بەلدەۋ، ءبىر جولدى» بىرگە قۇرۋ دارىپتەمەسى بىرتە - بىرتە باستامادان ارەكەتكە اينالىپ، يدەيادان ناقتىلىققا اۋىسىپ، اشىق جانە سيىسىمدى سەلبەستىك تۇعىرى مەن حالىقارالىق قوعام جابال قارسى العان عالامدىق قوعامدىق يگىلىككە اينالدى. 

قازىر حالىقارالىق جاعداي تۇپكىلىكتى جانە كۇردەلى وزگەرىستەرگە ۇشىراپ، الەمدىك ەكونوميكا تەرەڭ رەتتەۋلەر ارقىلى بىرتە - بىرتە ەس جيىپ كەلەدى، دامۋ ماسەلەسى ءالى دە اۋىر بولىپ وتىر، «ءبىر بەلدەۋ، ءبىر جول» قۇرىلىسى بىزگە بۇرىن بولماعان تاريحي ورايلار اكەلدى. وتكەن ايدا «ءبىر بەلدەۋ، ءبىر جول» حالىقارالىق سەلبەستىگى جوعارى دارەجەلى باسشىلار تالقى مىنبەرى بەيجيڭدە ءساتتى وتكىزىلدى، تاراپتار ءبىر اۋىزدان حالىقارالىق سەلبەستىكتى نىعايتۋ جانە دامۋ ستراتەگيالارىن ءوزارا ءتۇيىستىرۋ ارقىلى ءبىرىن - ءبىرى ارتىقشىلىقتارىمەن تولىقتاپ، قاتار دامۋدى ىلگەرىلەتۋ قاجەت دەپ قارادى. 

مەنىڭ قازاقستانعا كەزەكتى ساپارىمنىڭ باستى مىندەتى

− نازاربايەۆ زۇڭتۇڭمەن جاڭا جاعدايدا جۇڭگو مەن قازاقستاننىڭ جاپپاي ستراتەگيالىق سەرىكتەستىك قاتىناسىن ونان سايىن نىعايتۋ، جان - جاقتى سەلبەستىكتى جەدەلدەتە دامىتۋ جونىندە تەرەڭ پىكىر اۋىسىپ، جاپپاي ورنالاستىرۋ جاساۋ. ءبىز جۇڭگو مەن قازاقستاننىڭ بىرگە دامۋ، وركەندەۋ جولى بارعان سايىن كەڭەيىپ، ءساتتى بولا بەرۋىن شىن جۇرەكتەن تىلەيمىز. 

− ءبىز «ءبىر بەلدەۋ، ءبىر جولدى» بىرگە قۇرۋ سەلبەستىگىن ىلگەرىلەتىپ، دامۋ ستراتەگيالارىن ءتۇيىستىرۋدى جەدەلدەتىپ، «ءبىر بەلدەۋ، ءبىر جول» حالىقارالىق سەلبەستىك جوعارى دارەجەلى باسشىلار تالقى مىنبەرىنىڭ ناتيجەلەرىن بىرگە ىسكە اسىرۋىمىز كەرەك. وتكەل، كولىك تاسىمالى، زات اينالىمى سەلبەستىكتەرىنىڭ مۇمكىندىكتەرىن ونان سايىن اشىققا شىعارىپ، جاڭا ازيا - ەۆروپا ۇلى قۇرلىق كوپىرى، جۇڭگو - ورتا ازيا - باتىس ازيا ەكونوميكالىق ءدالىزى جانە «باتىس ازيا - باتىس جۇڭگو تاس جولى» قۇرىلىستارىن جەدەلدەتىپ، ءوزارا بايلانىس پەن ساۋدانى وڭتايلاندىرۋدى نىعايتۋىمىز كەرەك. قازىرگىدەن دە ءونىمدى قارجى سالۋ جانە قارجىلاندىرۋ مودەلى ۇستىندە ىزدەنىس جاساپ، ەكى جاق اراسىندا ۇلتتىق ۆاليۋتامەن ەسەپ ايىرىسۋدى كەڭەيتىپ، جۇڭگو - قازاقستان سەلبەستىك نىساندارىنا قولداۋ كورسەتۋ كەرەك. 

− ءبىز وندىرىستىك قۋات سەلبەستىگىن جۇڭگو - قازاقستان سەلبەستىگىنىڭ جاڭا ءوسۋ پوليۋسىنا اينالدىرىپ، ەكى جاق بەلگىلەگەن ەرتە ءونىم بەرەتىن نىسانداردىڭ اتقارىلۋىن جەدەلدەتىپ، وندىرىستىك قۋات سەلبەستىگى مەن قارجىلىق سەلبەستىك تۋرالى ديالوگ مەحانيزمىنەن ۇزدىكسىز ويداعىداي پايدالانىپ، اقپاراتتار اۋىسۋ مەن ساياساتتاردى ۇيلەستىرۋدىڭ ونىمدىلىگىن ساقتاپ، ەكى ەلدەگى كاسىپورىنداردىڭ ءبىر - ءبىرىنىڭ مەملەكەتىندە دامۋىنا تاماشا ىسكەرلىك ورتا ازىرلەۋىمىز كەرەك. 

− جوعارى تەحنولوگيالار مەن جاڭالىق اشۋ سەلبەستىگىن بار كۇشپەن دامىتىپ، عارىش، اۆياتسيا، سيفرلىق ەكونوميكا، جاڭا ەنەرگيا كوزدەرى سياقتى الدىڭعى قاتارلى سالالارداعى سەلبەستىكتى تەرەڭدەتىپ، ءىرى دەرەكتەر، بۇلتتىق ەسەپتەۋ، زياتتى قالا قۇرىلىستارىن ىلگەرىلەتىپ، اقپاراتتىق تەحنولوگيا جانە ەلەكتروندىق ساۋدا سالاسىنداعى سەلبەستىكتى جەدەلدەتىپ، جاڭالىق اشۋدى جەتەك ەتكەن دامۋدى قۇلشىنا ىسكە اسىرىپ، جۇڭگو - قازاقستان سەلبەستىگىنىڭ ءتىپتى جوعارى ساپامەن قارىشتاي العا باسۋىن ىنتالاندىرۋىمىز كەرەك. 

− ءبىز جۇڭگو مەن قازاقستاننىڭ حالىقتار تىلەگىن توعىستىرۋ ينجەنەرياسىن قۇرىپ، ادامدار اراسىنداعى بارىس - كەلىس پەن مادەني قارىم - قاتىناستاردى ءتىپتى بەلسەندى تۇردە ىلگەرىلەتۋىمىز، ءوزارا مادەنيەت ورتالىقتارىن قۇرۋ، بىرلەسىپ مەكتەپ اشۋ، كينو، تەلە، ادەبي تۋىندىلاردى اۋىستىرۋ سياقتى تاسىلدەرمەن ءوزارا تۇسىنىك پەن تانىمدى ىلگەرىلەتۋىمىز كەرەك. جۇڭگو ءتىپتى كوپ جۇڭگو ازاماتتارىن قازاقستانعا ساياحاتتاي بارىپ، «ۇلى دالا مەملەكەتىنىڭ» وزگەشە كەرەمەتىن سەزىنۋگە ىنتالاندىرادى.

− ءبىز حاۋىپسىزدىك سەلبەستىگىن ىشكەرىلەي ورىستەتىپ، ورتاق، امبەباپ، سەلبەسكەن، باياندى حاۋىپسىزدىك كوزقاراسىن امالياتتا كورسەتىپ، «ءۇش ءتۇرلى كۇشكە»، ەسىرتكى الىپ - ساتارلىعىنا، ەلارالىق ۇيىمداسقان قىلمىستارعا زاڭ بويىنشا سوققى بەرىپ، ينتەرنەت حاۋىپسىزدىگىن بىرگە قورعاۋىمىز كەرەك. «ءبىر بەلدەۋ، ءبىر جول» ەكى جاقتى حاۋىپسىزدىكتى قورعاۋ مەحانيزمىن جەدەل قۇرىپ، ەكى ەلدىڭ مۇناي - گاز قۇبىرىنىڭ، سونداي - اق ءىرى سەلبەستىك نىساندارىنىڭ حاۋىپسىزدىگىن قامتاماسىز ەتىپ، ەكى ەل ازاماتتارى مەن كاسىپورىندارىنىڭ زاڭدى ۇقىق - مۇددەسىن جانە ءومىرى مەن مال - مۇلكىنىڭ حاۋىپسىزدىگىن قورعاۋىمىز كەرەك. 

− ءبىز حالىقارالىق جانە كوپ جاقتى سالاداعى سەلبەستىكتەردى نىعايتۋىمىز كەرەك. ب م ۇ، شاڭحاي سەلبەستىك ۇيىمى، ازياداعى ءوزارا ىقپالداستىق جانە سەنىم شارالارى جونىندەگى كەڭەس سياقتى كوپ جاقتى جيەكتەمەلەر ىشىندە قارىم - قاتىناس پەن سايكەسۋدى كۇشەيتىپ، حالىقارالىق جانە وڭىرلىك ىستىق نۇكتەلەر جونىندە دەر كەزىندە پىكىر اۋىستىرۋىمىز كەرەك. جۇڭگو قازاقستاننىڭ ب م ۇ حاۋىپسىزدىك القالار كەڭەسىنىڭ 2017 -، 2018 - جىلدارداعى تۇراقتى ەمەس القا ەلى رەتىندە حالىقارالىق ىستەردە ءتىپتى زور رولىن ساۋلەلەندىرۋىن قولدايدى. 

مەنىڭ وسى رەتتە قازاقستانداعى تاعى ءبىر ماڭىزدى كۇن تارتىبىندەگى شارۋام − شاڭحاي سەلبەستىك ۇيىمىنىڭ استانا باس قوسۋىنا قاتىناسۋ. بيىل «شاڭحاي سەلبەستىك ۇيىمى ەرەجەسىنە قول قويىلعانىنىڭ 15 جىلدىعى جانە «شاڭحاي سەلبەستىك ۇيىمىنا مۇشە ەلدەردىڭ ۇزاق ۋاقىتتىق تاتۋ كورشىلىك دوستىق سەلبەستىگى شارتىنا» قول قويىلعاندىعىنىڭ 10 جىلدىعى. ۇزاق ۋاقىتتان بەرى مۇشە ەلدەر وسى 2 ماڭىزدى حۇجاتتا بەلگىلەنگەن جالپى ماقسات پەن پرينسيپكە تاباندى تۇردە بويسۇنىپ، ءوزارا سەنىم، ءوزارا پايدا جەتكىزۋ، تەڭدىك، كەڭەسۋ، الۋان ءتۇرلى وركەنيەتكە قۇرمەت ەتۋ، بىرگە دامۋعا ۇمتىلۋ سىندى «شاڭحاي رۋحىن» ساۋلەلەندىرىپ، ءوزارا سەنىمدى ۇزدىكسىز نىعايتىپ، ءار سالاداعى سەلبەستىكتى تىڭعىلىقتى ىلگەرىلەتىپ، ءوڭىردىڭ ورنىقتىلىعى مەن گۇلدەنۋىن جەبەۋگە ماڭىزدى ۇلەس قوستى. 

شاڭحاي سەلبەستىك ۇيىمى حاۋىپسىزدىك سەلبەستىگىنە ايرىقشا ءمان بەرىپ، «ءۇش ءتۇرلى كۇشكە»، ەسىرتكىگە، سونداي - اق ەلارالىق ۇيىمداسقان قىلمىستارعا سوققى بەرۋدىڭ سەلبەستىك مەحانيزمىن ورناتىپ، لاڭكەستىككە قارسى بىرلەسكەن مانەۆردى مەرزىمدى تۇردە وتكىزىپ، قاتىستى ىستىق نۇكتەلەردىڭ شەشىلۋىن بەلسەنە ىلگەرىلەتىپ، ءوڭىردىڭ حاۋىپسىزدىگى مەن ورنىقتىلىعىن ءونىمدى تۇردە قورعادى. 

شاڭحاي سەلبەستىك ۇيىمى مۇشە ەلدەردىڭ كوپ جاقتى ەكونوميكا - ساۋدا سەلبەستىگى باعدارلاماسى، اتالعان ۇيىمىنىڭ 2025 - جىلعا دەيىنگى دامۋ ستراتەگياسى سياقتى حۇجاتتارعا قول قويىپ جانە ونى مۇقيات تياناقتاندىرىپ، ساۋدا، قارجى قوسۋ، ءوزارا بايلانىس، ەنەرگيا، فينانس، اۋىل شارۋاشىلىعى سالالارىنداعى سەلبەستىكتەردى نىق قاداممەن ىلگەرىلەتىپ، مادەنيەت، وقۋ - اعارتۋ، جاستار، دەنساۋلىق ساقتاۋ، عىلىم - تەحنيكا، قورشاعان ورتانى قورعاۋ، ساياحات، سپورت سياقتى جاقتارداعى قارىم - قاتىناستاردى ۇزدىكسىز تەرەڭدەتىپ، ءار ەلدىڭ ەكونوميكالىق، قوعامدىق دامۋىنا جانە ءوزارا دوستىق سەلبەستىگىنە ءتيىمدى دەم بەردى. 

شاڭحاي سەلبەستىك ۇيىمىنىڭ كەزەكتى ءتوراعا ەلى بولعاننان بەرى، قازاقستان ۇيىمنىڭ دامۋىن ىلگەرىلەتۋگە بەلسەندى ۇلەس قوستى. الدا وتەتىن استانا باس قوسۋىندا، مۇشە ەلدەردىڭ باسشىلارى ءار سالاداعى سەلبەستىكتەردى، تەرەڭدەتۋ، سونداي - اق ۇيىمنىڭ تۇڭعىش رەتكى مۇشە سانىن مولايتۋ بارىسىن ورىنداۋى جونىندە ماڭىزدى قارار شىعارىپ، ۇيىمنىڭ كەلەسى قادامداعى دامۋىنا مىعىم نەگىز قالايدى. وسى رەتكى باس قوسۋدان كەيىن، جۇڭگو كەزەكتى ءتوراعالىق ەل مىندەتىن ۇستىنە الادى، قازاقستانمەن، سونداي - اق باسقا دا مۇشە ەلدەرمەن بىرگە قۇلشىنىپ، استانا باس قوسۋىن جاڭا باستاما ەتە وتىرىپ، شاڭحاي سەلبەستىك ۇيىمىنىڭ تىڭ دامۋدى ىسكە اسىرۋىن ىلگەرىلەتىپ، وڭىردەگى ءار ەل حالىقتارىن ءتىپتى جاقسى باق - ىرىسقا كەنەلتۋدى قالايدى. 

2017 - جىلعى استانا مامانداندىرىلعان الەمدىك كورمەسى الداعى كۇندەردە اشىلادى، بۇل − ورتا ازيا ەلدەرىندە تۇڭعىش رەت ءوتىپ وتىرعان الەمدىك كورمە، «بولاشاق قۋاتى» تاقىرىبى الەم ەكونوميكاسىنىڭ جاسىل، اقاۋسىز، باياندى دامۋ اعىمىنا ساي كەلەدى، جۇڭگو جاق العا قويعان «جاسىل جىبەك جولى» دارىپتەمەسىمەن بارىنشا ۇيلەسىم تاپقان.

جۇڭگو قازاقستاننىڭ وسى رەتكى الەمدىك كورمەنى وزگەشە ەرەكشەلىكپەن، جوعارى دەڭگەيدە وتكىزۋىن قولدايدى، جۇڭگو سارايى «جاساندى كۇندەگى» يادرولىق ءبولىنۋ، جوعارى جىلدامدىقتى تەمىر جولداعى ەلىكتەمەلى كابينا سياقتى ەڭ جاڭا تەحنيكالاردى كورسەتىپ، جاسىل، تومەن كومىرتەكتى، اينالمالى، باياندى ءوندىرىس جانە تۇرمىس ءتاسىلى دارىپتەلىپ، جاسىل دامۋ ۇستانىمىن ورىنداۋعا جۇڭگونىڭ اقىل - پاراساتىن ارنايدى. استانا مامانداندىرىلعان الەمدىك كورمەسىنىڭ تابىستى تولۋىن تىلەيمىن! 

قازاقستان تاۋەلسىزدىك العاننان بەرى، نازاربايەۆ زۇڭتۇڭنىڭ كورنەكتى باسشىلىعىندا، قوعامنىڭ جاراسىمدى، ورنىقتىلىعى ساقتالىپ، ەكونوميكا تەز دامىپ، حالىقتىڭ تۇرمىس دەڭگەيى مەن باقىت كورسەتكىشى كورنەكتى جوعارىلاتىپ، جالپىلىق مەملەكەت قۋاتى ۇزدىكسىز ارتىپ، الەمدەگى باسەكەگە قابىلەتتى الدىڭعى 50 ەلدىڭ قاتارىنان ورىن الىپ، «قازاقستان كەرەمەتىن» جارىققا شىعاردى. 

بۇگىنگى تاڭدا، قازاقستان 3 - جاڭعىرتۋدى باسشىلىققا الا وتىرىپ، «نۇرلى جول» جاڭا ەكونوميكالىق ساياساتىن، «2050 ستراتەگياسىن»، قوعامدىق سانانى جاڭعىرتۋ رەفورماسىن ىلگەرىلەتۋدە، قازاقستان حالقى ۇلتتىڭ گۇلدەنۋى، مەملەكەتتىڭ بايىپ قۇدىرەتتەنۋى سىندى «قازاقستان ارمانىنا» قاراي ارشىندى قاداممەن ىلگەرىلەۋدە. جۇڭگو حالقى دا «قوس 100 جىل» كۇرەس نىساناسى مەن جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن ورىنداۋ جولىندا تالماي قۇلشىنۋدا. ورتاق تىلەك، ورتاق ارمان جۇڭگو مەن قازاقستان حالىقتارىن تىعىز بايلانىستىرادى. ەكى ەل حالىقتارى ءبىر نيەتپەن ارمان ارقالاپ، تىزە قوسا ارمان قۋىپ، قول ۇستاسا ارماندى ىسكە اسىرۋدا. 

العان بەتتەن قايتپاي تاباندىلىقپەن العا ۇمتىلساق بولعانى، جۇڭگو - قازاقستان قاتىناسىنىڭ، ءسوز جوق، ارماننىڭ دەمەۋىندە ءتىپتى جارقىن بولاشاققا قاراي قانات قاعاتىندىعىنا سەنەمىن.

كەلۋ قاينارى: شينجياڭ گازەتى

http://kazakh.xjdaily.com