امانات
(اياۋلى اعا، اقىن، سىنشى بولەش قالي ۇلىنىڭ رۋحىنا)
سەرجان قابەت ۇلى
ءساۋىردىڭ ءالى ەسىمدە سەگىزى ەدى،
ءدال سول كۇن كەشەگىدەي سەزىلەدى،
بوكە اعام تۇستەن بۇرىن قولفون شالدى،
ەجەلدەن ارمانىمىز ەگىز ەدى.
بىلەم عوي بوكە اعامنىڭ جان ىرعاعىن،
كەل دەسە، قاي قاشاندا تابىلعانمىن.
شاكىرتتىك سالاۋاتپەن تەز قيمىلداپ،
قولما-قول قولفونىمدى قابىلدادىم.
بۇرىننان بىزگە دايىن مەكتەپ ەدى،
ايالاپ قوڭىر جەل بوپ ەسكەن ەدى.
اقىنعا ءتان ءموپ-مولدىر جۇرەگىمەن،
جاستارعا جاقسى اعا بوپ كەتكەن ەدى.
امال نە، اسقاق ەدى، ارلان ەدى،
قان قىسىم ەرتە قۇرىق سالعان ەدى.
جاقىندا تۇتقيىلدان اعامىزدىڭ،
سىرقاتى ءبىر سىر بەرىپ قالعان ەدى.
كوڭىلدەن كوپ تىلەكتەر ايتىپ ەدىك،
قويدى عوي قۇرعىر تاعدىر تايقى كەلىپ.
مالىكبايدىڭ ادالبەگى* سەرىك بولىپ،
ارنايى كوڭىل سۇراپ قايتىپ ەدىك.
اعانىڭ جاندى باۋراپ ىزگى لەبى،
سول كۇنى اڭگىمەمىز قىزعىن ەدى.
كاكىم* جايلى ءسال ءازىل قوزعاپتا الدى،
جەزدەسى قالجىڭىنىڭ تۇزدىعى ەدى،
ۇشەۋلەپ كوپ سىرلاردى اقتارعانبىز.
اعانىڭ قال-جايىنا ءساپ سالعانبىز،
كەتەردە جۇرەك جاردى تىلەك تىلەپ،
تەز ساۋىعىپ كەتسىن دەپ اتتانعامىز.
ال بۇگىن تەلەفوندا ءسوز ىڭعايى،
بۇرىنعىشا ماقامداپ سوزىلمايدى.
-قۇماڭدى بىلەسىڭ عوي،- دەپ باستادى،
اڭگىمە قوزعامادى ءوزى جايلى.
-قۇماڭنىڭ قۇرمەتتەگەن ەسىمىن ەل،
بىلەسىڭ باسەڭ ەدى دەسى كىمنەن.
ءبىر مىندەت جۇكتەمەكپىن ساعان بۇگىن،
امالسىز دەنساۋلىقتىڭ كەسىرىنەن.-
دەدى دە، ءسال تىنىستاپ جالعادى ارتىن،
ات كوتەرمەس اقىن عوي اتاق داڭقىن.
-ءتىرى بولسا كەلەر ەد سەكسەن جاسقا،
ەرتە كەتتى امال نە قۇماڭ مارقۇم.
كەۋدەسى التىن ساندىق شەجىرە ەدى،
جىرلارى جالىن قۇشقان سەزىم ەدى.
اقسۇڭقار اعا اقىندى اتاپ وتپەۋ،
تۇسىنسەك تىم ۇياتتاۋ سەزىلەدى.
ەسكە الۋ پارىز ەكەن وتكەن ءىستى.
قۇماڭنان تالاي شاكىرت كوكتەپ ۇشتى.
-دەپ بوكەڭ تاعى دا ءبىر كەڭەس ايتتى.
قاسىڭا قوسىپ ال دەپ قوس جەڭىستى*.
ءبىر كەسەل جاعالاپ ءجۇر جۇرەگىمە،
مەن بالكىم جەتە الماسپىن تىلەگىمە.
قۇماڭنىڭ سەكسەن جىلىن اتاپ وتپەۋ،
قيانات جاساۋمەن تەڭ جىر ەلىنە.
بوكە اعا ەسكەرتپەسە بىلمەستە ەدىم،
جاماندار قايدان سەزسىن بىلمەس تەگىن.
سوڭىندا وسى ءىس جايلى بوپەنمەنەن*،
ەسكەرتتى كەشە عانا تىلدەسكەنىن.
داريعا-اي، التىن ارقاۋ اقىلمانىم،
وسى وي، مازالاپتى-اۋ اسىل جانىن.
اعانىڭ لەبىزىنە باسىمدى ءيىپ،
قولقاسىن ەكى ەتپەستەن ماقۇلدادىم.
سۇم اجال سوندا ىرگەگە جەتىپتى عوي،
ويشىل جان، قايراتىنا بەكىپتى عوي،
كىم بىلگەن قايران بوكەڭ اماناتتاپ،
يگى ءىستىڭ باسىن باستاپ كەتىپتى عوي.
نۇر سيلاپ، ءساليقالى ءىس ساناعا تىڭ.
قوسىلدى ءىس-شاراعا عالامات ءۇن.
ورىنداپ جاتىر بۇگىن كوپ شاكىرتى،
اياۋلى بولەش اعا اماناتىن.
تۇسىنىكتەمە:
*-سىنشى ادالبەك مالىكباي ۇلى
*-بولەش اعانىڭ بولە جەزدەسى، اقىن كاكىم تولەۋباي ۇلى
*-جەڭىس تولەۋباي ۇلى، جەڭىس ورنباي ۇلى
*-بوپەن قۇماربەك ساقاريننىڭ قىزى
加载评论内容,请稍等......