جۇڭحۋا حالىق رەسپۋبليكاسىنىڭ مەملەكەتتىك 14-كەزەكتى دەنە تاربيە جارىسىنىڭ ەرلەر 75 كيلوگرامدىق سالماقتاعى بوكىس جارىسىنىڭ شەشۋشى جارىسى 2021-جىلى 9-ايدىڭ 21-جۇلدىزى شانشي ولكەسىندە مارەسىنە جەتتى، ەكى گرۋپپادان قارسىلاستارىن، ۇلكەن باسىمدىلىقپەن قاپى قالتىرىپ، سارالانىپ شىعىپ، ەڭ سوڭعى شارشى الاڭدا قولباق تۇيستىرگەن ەكى ارىس، قىزىق بولعاندا، قىزىق بولعاندا ەمەس-اۋ، كەپەشتى اسپانعا اتاتىن قۋانىش بولعاندا، ەڭ العاش قابا اۋداندىق ورتالاۋ مەكتەپتىڭ دەنە تاربيە مۇعالىمى، تانىمالى بوكىس باپكەرى مۇرات بوشاي ۇلىنىڭ تۇيەنىڭ وركەشىندەي ەكى شاكىرتى بولىپ شىقاندىعى، بۇل قوس ارىسىمىز التىن مەدال يەگەرى توقتاربەك تاڭلاتقان ۇلى مەن كۇمىس مەدال يەگەرى ۇلپار قارقىن ۇلى ەدى. توقتاربەك شينجياڭ كومانداسى اتىنان قاتىناسسا، ۇلپار بەيجيڭ كومانداسى اتىنان شارشى الاڭعا شىققان ەدى.

   مەن بۇل شاعىن ماقالامدا بەيجيڭ كومانداسى اتىنان تۇسكەن، بوكىس ساڭلاقتارى ىشىنەن، بىردەن ءبىر شەشۋشى جارىسقا جولداما الىپ، جۇلدە مىنبەسىنە كوتەرىلگەن، 14-كەزەكتى دەنە تاربيە جارىسىنىڭ، بوكىس ءتۇرىنىڭ 75 كيلوگرامدىق سالماقتاعىلار اراسىنان كۇمىستەن القا تاعىنعان، شويىن جۇدىرىقتى، شومبال ازاماتىمىز،  ۇلپار قارقىن ۇلى تۋرالى توقتالامىن.   

   ۇلپار قارقىن ۇلى 1996-جىلى اقپان ايىنىڭ 17-جۇلدىزى قابا اۋدانىنا قاراستى ساربۇلاق قالاشىعىنىڭ تۇلكىلى قىستاعىندا قاراپايىم شارۋا شاڭىراعىندا دۇنيەگە كەلگەن ەدى. شىر ەتىپ ءومىر ەسىگىن اشقان نەمەرەسىنىڭ ۋىز ءيسى اتاسى مەن اپاسىنىڭ كەڭسىرىگىن قىتىقتاپ، اڭسارىن اۋدارا بەرەدى دە، ءبىر جولاتا باۋىرىنا باسىپ الادى. ەكى قارتتىڭ ەندىگى ەرمەگى، وسى نەمەرەسىنىڭ قىزىعى بولادى دا، ەزۋىندەگىسىن جىرىپ بەرىپ، اكە-شەشەسىنىڭ قارسىلىعىنا قاراماي ەركە-شولجاڭ وسىرەدى. قاقپاي كورمەي قارا قۇلاقتانعان ۇلپار بەس جاستىڭ بەلىن باسقان شاقتان باستاپ، تەلە ارنادان سپورت ايدارىن كورۋگە قىزىعا باستايدى، اسىرەسە بوكىس ونەرىنە اۋكەسى اۋا بەرەدى. اۋداندا وقيتىن ەرەسەك بالالاردىڭ اۋزىنان، بوكىس باپكەرى مۇرات بوشاي ۇلىنىڭ شاكىرتتەرىن قالاي باپتايتىنىن، قالاي ماشىقتاندىراتىنىن، سايىس مايدانىنداعى تاماشا تابىستارىن ەرتەگى تىڭداعانداي ىنتى- شىنتىسىمەن ۇيىپ تىڭدايتىن-دى، ءارى ماي سۇراساڭ مىنە قۇيرىق دەگەندەي، اۋەستىگىنىڭ اۋپىرمىندە وسى ونەرگە قۇلاي عاشىق بولادى. اعالارىنان ەستىگەنى بويىنشا اتاسىنا پەرەزەنتتەن دوربا تىكتىرپ، قۇم تولتىرىپ لاپاسقا ءىلدىرىپ الىپ، ەرتەلى-كەش تۇيگىشتەپ، بالا ۇلپار وزىنشە العاشقى ماشىعىن وسىلاي باستايدى عوي. 

  2003-جىلى مەكتەپ تابالدىرىعىن اتتاعان ۇلپار بوكىسكە دەگەن اۋەستىگىن سۋىتپاي، 2005-جىلى اۋداندىق 2-باستاۋىش مەكتەپتىڭ 3-جىلدىعىنا كەلىپ وقۋىن جالعايدى. بۇل وراي، بالا ۇلپاردىڭ قالاعا بارىپ، مۇرات اعادان ءتالىم السام دەگەن كوكەي تەستى ارمانىنا ەسىك اشقانداي بولادى. كوكەيىندەگى كوپتەن ۇشقىنداعان بالاۋسا تىلەگىن اعالارىنا ايتىپ ءجۇرىپ، سول جىلدىڭ وزىندە اقىرى مەملەكەتتىك 2-دارەجەلى بوكىس باپكەرى مۇرات بوشاي ۇلىنىڭ الدىنا بارادى. ات بولاتىن قۇلىندى مۇشەسىنەن تانيتىن، تالاي تاستۇلەك قىراننىڭ باۋىن اشىپ، توماعاسىن سىپىرعان قىران كوز باپكەر، الدىنا كەلگەن ۇلپاردىڭ باسقا تۇستاس بالالاردان بوگەنايى بولەك، دەنە بىتىمىنە بارلاي قاراپ، جالپاق جاۋىرىنى مەن شىپ-شىمىر قول-اياقتارىن ۇستاپ كورگەن جەردەن، تەكتى قۇلىن ەكەنىن جازباي تانيدى دا، سول مايداندا شاكىرت ەتىپ قابىلداۋعا ماقۇلدىق بەرىپ، بولاشاق تۇلپارىمىزدىڭ بالا جۇرەگىنە شەكسىز قۋانىش سىيلاپ قايتارادى، سودان باستاپ بالا ۇلپار ساباعىن وقي ءجۇرىپ، سەنبى، جەكسەنبى كۇندەرى ءوزى ارمانداعان ۇستازىنىڭ الدىنان ءتالىم الادى. ءوزى تۇستاس بالالاردان سۇيەگى كەسەك، تۇلعاسى ءىرى، سالماعى اۋىر بولعاندىقتان، نەشە جىل ماشىق كورىپ، ىسىلعان تولىقسىز ورتانىڭ وقۋشىلارىمەن بىرگە ماشىق كورۋىنە تۋرا كەلەدى، ونەرگە دەگەن ولەرمەندىگى وزىنەن ۇلكەن اعالارىمەن بۇلعارى قولعاپ تۇيستىرۋدەن جاسقاندىرمايدى، دەسەدە جۇيەلى ماشىق كورمەگەن ۇلپار كۇشى قانشالىق باسىم بولسادا، ءادىس-ايلا جاعىندا قارا جاياۋ ەدى،  سول سەبەپتىدە اعالارىمەن ايقاسا كەتكەندە، ايلاسى باسىم، ءتىس قاقتى اعالارىنان تالاي جۇدىرىق جەپ، قارسى جاققا بەينە قۇم تولتىرعان ماشىق دورباسىنىڭ رولىن ويناپ ءجۇردى، وسىنداي جاپالى ماشىققا شىداي ءجۇرىپ، بىرتە-بىرتە ءوزىنىڭ الىمدىلىعىندا تانىتا باستايدى. اۋدان كولەمى ىشىندەگى  جارىستارعا قاتىناسىپ، جاقسى ناتيجەلەرگە قول جەتكىزەدى. 2009-جىلى تولىقسىز ورتا مەكتەپكە بارعاننان كەيىن، رەسمي تولىقسىز ورتا مەكتەپتىڭ كاسىپتەن سىرتقى بوكىس كومانداسىنا مۇشە بولادى، ءارى اۋدان اتىنان ايماق وزدىرعان جارىستارعا جول الا باستايدى، 2010-جىلى 14 جاسقا ەندى تولعان ۇلپار التاي ايماقتىق بوكىس جارىسىندا 63 كيلوگرامدىق سالماقتا اعا جۇلدەگەر بولىپ، بولاشاعىنان ۇلكەن ءۇمىت كۇتتىرەدى، باپكەرى مۇكەڭدە ونىڭ تەبىنىنەن ەرتەڭىن تانىپ، ونان سايىن اۋىر تالاپ قويىپ، ماشىق سالماعىن ارتتىرا تۇسەدى، باپكەر ءۇمىتىن جەردە قالدىرماعان ۇلپار 2011- جىلى 5-ايدا التاي ايماعىندا وزدىرىلعان 70كيلوگرامدىق سالماقتا اعا جۇلدەگەر بولسا، 6-ايىندا اۆتونومالى رايوندا وزدىرىلعان جاستار مەن جاس-وسپىرىمدەر بوكىس سايىسىندا 69 كيلوگرامدىق سالماقتاعىلارمەن قولعاپ ءتۇيىسىپ، 3- ورىندى يەلەيدى، شىلدە ايىندا تاعى دا اۆتونوميالى رايوندا وتكەن بوكىس سايسىندا 1 كيلوگرام سالماق جالعاپ، 70 كيلوگرامدىق سالماقتاعىلار اراسىندا الدىڭعى ۇشتىكتى قانجىعالايدى. 2012-جىلى 11- ايدا وتانىمىزدىڭ استاناسى بەيجيڭ قالاسىنان كەلىپ، بوكىس تايانىش كۇشتەرىن تالداپ جۇرگەن باپكەرلەردىڭ كوزىنە ءتۇسىپ، اق جولتاي ازاماتىمىز ورتالىق بوكىس سپورتشىلارىن تاربيەلەۋ ورتالىعىنا توتە قابىلدانادى. سودان باستاپ اناعۇرلىم كەمەلدى مەكتەپ، كورەگەن باپكەرلەردەن تاربيە كورگەن بولاشاق ارىسىمىزدىڭ كوز اياسى كەڭىپ، بابىنا كەلە باستايدى. ەندى اۆتونوميالى رايون كولەمىندەگى ارىپتەستەرىمەن عانا ەمەس، بۇكىل ەلىمىز كولەمىندەگى جۇيەلى ماشىق كورگەن، ازۋى التى قارىس ارلاندارمەن ايقاسۋ ورايىنا يە بولادى. 2013-جىلى 7-ايدا بۇكىل ەل كولەمىندە وزدىرىلعان جاستار مەن جاس-وسپىرىمدەر دوداسىندا باعىن سىناپ، 75 كيلوگرامدىق سالماقتاعىلار اراسىنان 3- ورىنعا مالداس قۇرادى، سول جىلى 12-ايدا 75 كيلوگرامدىق سالماق ورتاسىنداعى ارلاندارمەن ارباسىپ ەكىنشى تاقتىڭ القاسىن مەنشىكتەنەدى. ۇلان بايتاق وتانىمىزدىڭ ەڭ قيىر باتىس-سولتۇستىگىندەگى اياداي اۋىلدا كىندىگى كەسىلىپ، ءومىر ەسىگىن اشقان، ۇلتىمىزدىڭ قارا دومالاق ۇلى، قۇدىرەتتى وتانىمىزدىڭ نۇر-شۇعىلاسىندا شاپقان سايىن ادىمى اشىلىپ، تۇلپارداي تەبىن تانىتىپ، 2014-جىلى 6-ايدا بۇكىل ەل بويىنشا وزدىرىلعان جاستار مەن جاس-وسپىرىمدەردىڭ ورتاسىندا وزدىرىلعان الاماندا كوش جاقتاندا، ءادىس-امال  جاقتاندا الىمدىلىعىن ايگىلەپ، قارسىلاستارىن ارت-ارتىنان زاكوتقا وتىرعىزىپ، 75 كيلوگرامدىق سالماقتاعىلاردىڭ اراسىنان اعالاپ العا شىعىپ، كەۋدەسىنە جارقىراتىپ التىننان القا تاعىنادى. وسىندان كەيىنگى جىلداردا ەل ىشىندەگى ۇلكەندى-كىشىلى دودادا ءۇش رەت اعا جۇلدەگەر، ەكى رەت جۇلدەگەرلىك تۇعىردان كورىنىپتە ۇلگىرىپتى، 2015-جىلى مەملەكەت كامانداسى اتىنان امەريكادا ەكى اي، 2016-جىلى 12-ايدان باستاپ  ورىس ەلىندە ەكى اي ماشىقتا بولىپ، ءارى وسى ەلدەردە جانە يىنديادا دوستىق جارىستارعا قاتىناسادى. 2018-جىلى 9-ايدا كاناداعا بارىپ، جۇڭگو، امەريكا، كانادا، مەكسيكا قاتارلى ءتورت ەلدىڭ دوستىق جارىسىندا جۇلدەلى بولىپ ورالادى. مىنە بىيىل 26 جاسقا كەلىپ تولىسقان ازاماتىمىز 2021- جىلى 4-ايدىڭ 20- جۇلدىزىنان 25-جۇلدىزىنا دەيىن حۋبي ولكەسىندە وتكەن، بۇكىل مەملەكەتتىك بوكىس ساۋىتىنا تالاسۋ، سونداي-اق  14-كەزەكتى دەنە تاربيە جارىسنا تولىمدىلىق الۋ جارىسندا 75كيلوگرامدىق سالماقتاعىلار اراسىنان اعالاپ العا شىعىپ اعا جۇلدەگەرلىكتى جەڭىپ الادى، ءارى ۇزدىك سپورتشى دەگەن داڭق كۋالىگىمەن ماراپاتتالىپ، 14-كەزەكتى دەنە-تاربيە جارىسنا توتە جولداما الادى، ءسويتىپ كەشە عانا وتكەن جۇڭحۋا حالىق رەسپۋبليكاسىنىڭ مەملەكەتتىك 14-كەزەكتى دەنە-تاربيە جارىسىندا قارسىلاستارىنا دەس بەرمەي ءبىر گرۋپپادان اعالاپ العا شىىپ، ەندى ءبىر گرۋپپانىڭ جەڭىمپازى، بالا كۇنگى سەرىگى، توقتاربەكپەن ءتۇيىلىسىپ قالادى دا، از نومىرمەن ارىپتەسىنە ەسە جىبەرىپ، كۇمىس مەدالدى قانجىعالايدى. قالاي بولماسىن، بالا كۇنگى ءبىر باقىردىڭ ءدامىن تاتقان، ءبىر باپكەردىڭ الدىنان تۇلەپ ۇشقان ەكى باتىر ۇلدىڭ، ۇلى وتانىمىز قۇشاعىندا، الىپ ەلدىڭ بىيىگىندە 75 كيلوگرامدىق سالماقتاعى بوكىس مىقتىلارىنىڭ اراسىنان تولقىن جارىپ شىعىپ، يىق تىرەسىپ قاتار تۇرۋى قانداي قۋانىش، قانداي ماقتانىش دەسەڭشى! اۋىلدىڭ بالاسى اتقا شاپسا، اناسى ۇيدە وتىرىپ تاقىمىن قىساتىن حالىقتىڭ ۇرپاعىمىز عوي، ماڭدايى جارقىراپ قارا دومالاق ۇلدارىمىز مەملەكەتتىك بايگەدەن كەلىپ جاتسا، نەگە الاقايلاپ، بورىكتى اسپانعا اتپاسقا، نەگە التى الاشقا شۇيىنشىلەپ جۇگىرمەسكە، «ەلدىڭ اتىن ەر شىعارادى» دەگەن اتالى ءسوز وسىنداي اق ماڭداي ازاماتتارىمىزعا قاراتىپ ايتىلعان-اۋ شاماسى. ءيا اياۋلى ۇلپار باۋىر! وتاننىڭ نامىسىن، ەلدىڭ ابىرويىن اسقاقتاتا بەر، بيىكتەن بيىككە قانات قاعىپ، الەمدىك دودالاردا وتان تۋىن دۇنيە ساحىناسىندا جەلبىرەتەتىن كۇن بولعاي!