كەدەيلەردى سۇيەمەلدەۋگە قاتىستى ءبىر ينفورماتسيا ميلليون يۋاندىق تاپسىرىس الا كەلدى

”جاڭ شۋجي، مىنا 168 مامىق شاپان مەنىڭ ازعانتاي كوڭىلىم، قىستاقتاعى بالالاردىڭ قىستا جىلى ءجۇرۋىن تىلەيمىن!“ 12 - ايدىڭ 1 - كۇنى لياۋنيڭ ولكەسىنىڭ داليان قالاسىنداعى دۇڭ گۇيفاڭ ءۇشتۇرپان اۋدانى العا قالاشىعى جارباسى قىستاعىنىڭ ءبىرىنشى شۋجيى جاڭ شينگە تاعى ءبىر رەت تەلەفون سوعىپ، ءوزىنىڭ جارباسى قىستاعىنىڭ كەدەيلەردى سۇيەمەلدەۋ قىزمەتىنە قاتىناسۋ بەكىمىن بىلدىرەدى. ءبىراز ۋاقىتتىڭ الدىندا، دۇڭ گۇيفاڭ كەدەيلەردى سۇيەمەلدەۋگە قاتىستى ءبىر ينفورماتسيانىڭ باۋراۋىمەن جارباسى قىستاعىنا كەلىپ، قىستاقپەن ميلليون يۋاندىق جاڭعاق تاپسىرىسى توقتامىنا قول قويىسىپ، ءۇشتۇرپان اۋدانىنىڭ كەدەيلىكتەن ارىلتۋدان قامال الۋىنا دەم بەرگەن بولاتىن.

بۇل ءىستى 11 - ايدىڭ 10 - كۇنىنەن باستاپ ايتۋعا تۋرا كەلەدى. سول كۇنى تۇستەن بۇرىن دۇڭ گۇيفاڭ جارباسى قىستاعىنا سۋىت كەلىپ، قىستاق كادرلارىنىڭ جول باستاۋىندا قىستاقتا تۇراتىن قىزمەت اترەتى كەڭسەسىنە قاراي تارتادى، كەڭسەگە كىرىپ بارىپ داۋىستاپ جاڭ شيندى ىزدەيدى.

”مەنىڭ اتىم دۇڭ گۇيفاڭ، لياۋنيڭ ولكەسىنىڭ داليان قالاسىنانمىن، جاڭ شۋجيدەن جاڭعاق ساتىپ الايىن دەپ كەلدىم!“، - دەيدى دۇڭ گۇيفاڭ كۇلىمسىرەي قىستاقتا تۇراتىن قىزمەت اترەتىنىڭ مۇشەلەرىنە ءوزىنىڭ كەلگەن ءمان - جايىن تانىستىرىپ.

ازدان كەيىن قىستاق تۇرعىندارىنىڭ وتباسىلارىن ارالاپ حال - جاعدايىن ۇعىسىپ جۇرگەن جاڭ شين دەرەۋ كەڭسەگە قايتىپ كەلەدى. دۇڭ گۇيفاڭ قول تەلەفونىن الىپ شىعىپ، ءىشىن اقتارىپ ”ءۇشتۇرپان اۋدانى: جاڭعاقتى باستاپقى وڭدەۋمەن كىرىستى ارتتىرۋ جولىن كەڭەيتتى“ دەگەن ماقالانى تاۋىپ شىعىپ، جاڭ شينگە كورسەتتى. ”قاراڭىزشى، مەن وسى ماقالانى كورىپ ىزدەپ كەلىپ تۇرمىن، سىزدەن جاڭعاق ساتىپ الايىن دەپ كەلدىم!“، - دەيدى دۇڭ گۇيفاڭ.

اسىلىندە، دۇڭ گۇيفاڭ ءبىر يمپورت - ەكسپورت سەرىكتەستىگىنىڭ جاۋاپتىسى بولىپ، قۇرعاق جەمىس ەكسپورت ەتۋ ساۋداسىمەن شۇعىلدانىپ كەلگەن، بيىل شەتەلمەن ءبىر تاپسىرىسقا قول قويىسىپ، شۇعىل ءبىر توپ جاڭعاق ساتىپ الۋى كەرەك بولعان ەدى. بۇرىن جاڭعاق ساتىپ الۋى ءبىرشاما از بولعاندىقتان، الاڭسىز زات قاينارىن تابا الماعان بولاتىن. اقسۋ ايماعىنىڭ ساپالى جاڭعاق وندىرەتىن نەگىزگى ءوندىرىس ءوڭىرى ەكەندىگىن ەستىپ، ينتەرنەتتەن ينفورماتسيا ىزدەگەن كەزدە، جارباسى قىستاعىنىڭ جاڭعاقتان مول ءونىم العاندىعىن ءارى قىستاقتا تۇراتىن قىزمەت اترەتى كەپىل بولاتىندىعىن بىلگەننەن كەيىن، جاڭعاقتىڭ ساپاسى، ءسوزسىز، ويداعىداي شىعادى دەپ ويلاپ، اسىعىس - ۇسىگىس ىزدەپ كەلگەن ەكەن. ”جاڭعاقتى قايدان ساتىپ السام دا ۇقساس، ءبىراق، جارباسى قىستاعىنىڭ جاڭعاعىن ساتىپ الىپ، وسىنداعى بۇقارانىڭ كەدەيلىكتەن ارىلىپ اۋقاتتانۋى ءۇشىن ءبىراز جۇمىس ىستەسەم دەيمىن، سوندىقتان وسى ارانى تاڭدادىم“، - دەيدى دۇڭ گۇيفاڭ.

دۇڭ گۇيفاڭنىڭ كەلگەن ءمان - جايىن ۇعىسقاننان كەيىن، جاڭ شيننىڭ قۋانىشى قوينىنا سيمادى، ول دۇڭ گۇيفاڭدى ەرتىپ الىپ جارباسى قىستاعىنىڭ يۋانديڭ ورمان - جەمىس كاسىپتىك سەلبەستىك كووپەراتيۆىن ەكسكۋرسيالاتادى، سەلبەستىك كووپەراتيۆىندەگى ساپالى جاڭعاقتاردىڭ قابىعى جۇقا، ءدانى تولىق، ەتى مايدا ەكەندىگىن كورگەن دۇڭ گۇيفاڭ شىن پەيىلىمەن: ”جارباسى قىستاعىنىڭ جاڭعاق ساپاسى، شىنىندا، جاقسى ەكەن، جەردى دۇرىس تاڭداعان ەكەنمىن“، - دەپ ماقتادى.

سورتىن بەلگىلەۋ، ۇلگىسىن كورۋ، باعاعا كەلىسۋ... جارتى كۇن كەڭەسۋ ارقىلى ەكى جاق كەلىسىمگە كەلدى، دۇڭ گۇيفاڭ كيلوگرامى 18 يۋاندىق باعامەن 60 توننا جاڭعاق ساتىپ الۋعا بەكيدى، جالپى قۇنى ءبىر ميلليون 80 مىڭ يۋان بولادى.

تاپسىرىسقا قول قويىسىپ بولىپ كوپ وتپەي، يۋانديڭ ورمان - جەمىس كاسىپتىك سەلبەستىك كووپەراتيۆىنىڭ جاۋاپتىسى ءالي ءىميت دۇڭ گۇيفاڭنىڭ الدىن الا تولەيتىن سوماسى 500 مىڭ يۋاندى تاپسىرىپ الادى، ول قۋانا: ”بۇل سەلبەستىك كووپەراتيۆىمىزدىڭ ەڭ تەز، جالاڭ سوماسى ەڭ مول تاپسىرىسىمىز بولدى!“، - دەدى.

تاپسىرىس اتتانىسقا كەلتىرۋ بۇيرىعى بولدى. سەلبەستىك كووپەراتيۆىندەگى بارلىق قىزمەتكەر تۇگەلدەي اتتانىسقا كەلىپ، سۇرىپتاۋ، داعارلاۋ، تارازىلاۋ، اۋزىن تىگۋ، بەلگى جاپسىرۋ، اۆتوكولىككە باسۋداي ناقتى جۇمىس ءبولىنىسى ءتارتىپتى ءجۇرىلىپ، تىعىز سايكەستى. ”ەستۋىمىزشە، ءبىزدىڭ جاڭعاعىمىز قىستاعىمىزدا تۇراتىن قىزمەت اترەتىنىڭ كەدەيلەردى سۇيەمەلدەۋ ينفورماتسياسىنىڭ ارقاسىندا ساتىلىپتى، تاعى شەتەلگە ەكسپورت ەتىلەدى ەكەن، ءبىز قۇلشىنا ىستەيمىز، ماركامىزدى بۇلدىرۋىمىزگە بولمايدى“، - دەدى قىستاق تۇرعىنى ابلەز مامەت قاباعات قۋانىپ، ول جۇمىسقا دا قۇلشىنا كىرىسىپ كەتتى.

دۇڭ گۇيفاڭنىڭ جاڭعاق ساتىپ الۋ ساۋداسى جۇزەگە استى. كىم بىلگەن، 12 - ايدىڭ 1 - كۇنى جارباسى قىستاعى تاعى دا 168 مامىق شاپان سالىنعان مەيىر سالەمدەمەسىن تاپسىرىپ الدى. دۇڭ گۇيفاڭ تەلەفوندا: ”جاڭ شۋجي، ساۋدامىز اياقتادى، ءبىراق، كەدەيلەردى سۇيەمەلدەۋ ءالى اقىرلاسپادى، مەن جارباسى قىستاعىنا ۇزبەي نازار اۋدارامىن، شينجياڭنىڭ كەدەيلىكتەن ارىلتۋدان قامال الۋ ىستەرىنە ءتىپتى دە كوپ ۇلەس قوسۋدى ءۇمىت ەتەمىن“، - دەدى.