جەتى قابا ازىلدەرى

مارحۇم ءناسىروللا ءابدوللا ۇلى: رۋى شىبارايعىردىڭ توعىزاق اتاسىنان ،كەزىندە قابا اۋدانى ساربۇلاق قالاشىعىنىڭ مال دارىگەرى بولعان ادام.

▲ كولىكتىڭ تاپشى كەزى، ءناسىروللا بار ءبىر قانشا ادام توقتامىس دەگەن تراكتورستىڭ تراكتورىنا وتىرىپ ساربۇلاقتان قالاعا جول الادى، كۇدىر جولدا ادامداردىڭ تىنشى كەتكەنىنە قاراماي توقاڭ تراكتورىن ەكپىندەتىپ كەلە جاتادى، ءبىر شۇقاناقتان سالدىر – گۇلدىر وتە شىققاندا تراكتوردىڭ ۇستىندە جاتقان فىندىڭ(قىزدىرۋ اسپابى) سىرعىپ تۇسىۋگە اينالعاندا ءوزى ازەر وتىرعان ناكەڭ ساپ بەرىپ ۇستاي الىپ:

-فىندىڭ،

مەن بولماسام سىندىڭ،

ولگەن تىرىلگەنىڭە قارايتىن ەمەس،

توقتامىس دەگەن جىندىڭ،- دەپ تاقپاقتاتقان ەكەن .

▲ كوكتەمگى مالشارۋاشىلىق جينىندا اۋىلدىقتىڭ اسىرە بەلسەندى باسشىلارىنىڭ ءبىرى جينداعىلارعا:

- بۇل اۋىلدىقتىڭ جوسپارى ، بيىل ءسوزسىز ءجۇز ساۋلىقتان ءجۇز جيىرما قوزى الۋىمىز كەرەك - دەپ ايقۇلاقتانىپتى ، سوندا ارت جاعىن الا وتىرعان ناكەڭ ورنىنان تۇرىپ:

- باسەكە ونى اۋىلدىقتىڭ جوسپارى بىلمەيدى، قويعا قوسقان قوشقارى بىلەدى،- دەپ جيندى كولكىگە اينالدىرىپ جىبەرىپتى.

▲ اۋداننان قىزمەت گرۋپپاسى بولىپ تۇسكەن ەركىنبەك دەگەن جىگىت، كەڭسە الدىندا ءناسىروللاعا قارسى جولىعىپ قالىپ:

- سالەمەتسىزبە؟ ناكە،- دەپ قول بەرگەندە ، ناكەڭ:

- امان جۇرسىڭبە؟ اكە،- دەپ قولىن العان ەكەن .

▲ناكەڭ ماگەزينگە كىرىپ بارسا اراق ءىشىپ تۇرعان، ءبىر توپ جىگىت بوتەلكەنىڭ تۇبىندە قالعان اراقتى قۇيىپ بەرىپ، ەندىگى كەزەك ساعان كەلدى،- دەپ قولقا سالىپ تۇرعاندا، ناكەڭە جەڭگە بولىپ كەلەتىن ءبىر ايەل:

- ءاي قاينىم نە تۇرىس؟- دەيدى عوي سوندا ناكەڭ:

-« قۇتىبي» ءىشىپ قۇتىرىپ، تۇبىن ءىشىپ تۇتىلىپ تۇرمىن عوي،- دەگەن ەكەن .

▲ جايلاۋدان مالدىڭ ەكپەسىنەن قايتقان ناكەڭ كوشەدەگى سابىلىسقان ەلدەن اۋىلدىق باستىعى توي جاساپ جاتىر دەگەندى ەستىيدى دە ، جولدا جۇرگەن ءبىر مىسىقتى ۇستاپ الىپ تويعا بارىپتى. اۋلادا تۇرعان باستىعىنا مىسىقتى ۇستاتىپ جاتىپ:

- ۇيىڭىزگە تىشقان جولاماسىن، وزىڭىزگە دۇشپان جولاماسىن،- دەگەن ەكەن .

▲جايلاۋداعى ءبىر اۋىلداسىنىڭ ۇيىندە تاماقتانىپ بىرەر بوتەلكەنى ەرمەك ەتىپ وتىرعان ناكەڭنىڭ ۇستىنە كەلگەن اۋىلدىڭ ءبىر جاۋاپتىسى:

- ناكە نە ىستەپ جاتىرسىڭدار؟،- دەپ سۇراعان دا ناكەڭ:

- بار بولسا تايىنشا ءپىشىپ، جوق بولسا اراق ءىشىپ جاتىرمىز،- دەگەن ەكەن .

▲ ءبىر كەزدە اۋدانداردا ايىقتىرۋ ورنى دەپ، كوشەگە تەمىردەن قاپاس ورناتىپ قويعان، ءبىر كونى تۇندە قىزىپ كەلە جاتقان ناكەڭدى، پايسۇرلار(ساقشىلار) قاپاسقا قاماپ تاستاپتى ، تاڭەرتەڭ ەرتە جولاۋشىلاپ شىققان بىرەۋ ناكەڭدى كورىپ :

- وي ناكە بۇنىڭ نە ؟- دەسە ، ناكەڭ :

- ە، بۇلبۇلىڭ سايراپ تۇرعوي - دەگەن ەكەن .

جيناپ رەتتەگەن : سەرجان قابەت ۇلى