سەرىك مۇقاي ۇلى
مۇنزياعا
مۇنزيا قانداي ەدىڭ ون سەگىزدە
جايناعان جالعىز گۇل ەڭ ولكەمىزدە.
سەنەن ارتىق بىرەۋ بار دەي المايمىن،
ءوزىڭ ءبىل سەنبەسەڭ دە، سەنسەڭىزدە.
مۇنزيا قانداي ەدىڭ جيىرماڭ دا،
جاندى ورتەپ كەتۋشى ەدىڭ قيىلعاندا،
سۇلۋى «مىڭ ءبىر ءتۇننىڭ»سەن دەۋشى ەدىك،
جوتاڭا قۇلاڭ شاشىڭ قۇيىلعاندا.
تۇماننىڭ توستەن اققان تۇنىعى ەدىڭ،
تۇلپاردىڭ ءمىن تابىلماس قۇلىنى ەدىڭ.
وي سالعان وتىزىندا سان اقىنعا،
جىرىنا قان جۇرگىزەر جۇلىنى ەدىڭ.
مۇنزيا ءالى دە ءورتسىڭ قىرىعىڭدا،
وزەننىڭ قىزىلىنداي تۇنىعىندا.
ارمانى كەتكەن ەدى جۇرەگىمەن،
بايلانىپ سان جىگىتتىڭ بۇرىمىڭدا.
اۋىرسا جازاتىنداي ءسوزى ءبىر ەم،
كوڭىلىندە كوكتەم ەسىپ كوزى كۇلگەن.
جولىقساڭ مۇنزياعا اعايىندار،
قاراڭدار مەنىڭ ۇلى سەزىمىممەن.
كورشى قىز
بيىك بوپ قول جەتپەيتىن شىرقاۋ قاشان،
جەل ءتيىپ ديدارىڭدى كۇن شالماعان.
كورشى قىز الىس ماڭعا كەتىپ ەدىڭ،
قۇربىڭا كوز قيىعىن ءبىر سالماستان.
قايتەيىن سۇلۋ ارمان ۇستاتپادى،
ءدات ءجۇرىپ، ءسوز ايتۋعا ءتىس باتپادى.
بيىككە ءتاڭىر سەنى قويعانىن-اي،
سوپىنىڭ قوجىراسىنداي ۇشپاقتاعى.
سەكىلدى ەد ءار ءبىر لەبىڭ ءبىر-ءبىر ولەڭ،
قىز ەدىڭ قىزىلقاتتاي ۇلبىرەگەن.
وراعان جاستىعىمدى ساعىنىش ەڭ،
دەرتى ەدىڭ جۇرەگىمدى تىلگىلەگەن.
كوركىڭە ورتەنگەندەي بەتتەگى گۇل،
ەسىمنەن سول ءمۇسىنىڭ كەتپەدى ءبىر.
ءدام تارتىپ سەن كەتكەندە باسقا اۋىلعا،
كەشكەندەي كەيۋشى ەدىم تەككە عۇمىر.
سانامدا كوزىڭ قالدى تۇنجىراعان،
قۇلاقتا كۇلكىڭ قالدى سىڭعىرلاعان.
ءورىلدى ولەڭىم بوپ قوس بۇرىمىڭ،
بۇلاقتاي بويىن تاۋدان مىڭ بۇراعان.
سونداعى قايران اۋىل گۇل مەكەنىم،
قاسىڭدا بىرگە وينايتىن كۇندە سەنىڭ.
سونداعى جاس قۇربىڭنىڭ ويلادىڭ با؟
جۇرەگى ماڭگى سەنمەن ءبىر كەتەرىن.
قىلىعىڭدا ءتاتتى ەدى قاسىڭ كەرىك،
باسپالاۋشى ەد ءۇمىتىم شاشىڭدا ەرىپ.
ويلادىڭ با؟ ءبىر اقىن جىرلايدى دەپ،
جۇرەگىنىڭ تۇبىنە جاسىن كومىپ.
ويلامادىڭ ويلاۋعا ۇلگىرمەدىڭ،
باق ىزدەگەن الىستان تۇنجىر كوزىم.
ارمان بولىپ قۇربىڭا كەتەرىڭدى،
وسى جاسقا كەلگەنشە بىلدىڭبە ءوزىڭ؟
قانشا جىل وسى سەزىم تاسقىن اتتى،
كەشسەمدە قانشا داۋرەن جاقسى- جاقسى.
سونداعى سۇلۋ ءومىر ەلەس بولدى،
سونداعى قارا شاشىم اققا ۇلاستى.
سەنى ايتسام ەڭىرەيمىن تىم ارىدان،
جانتاقتاي جاپانداعى قۇلازىعان.
دەسەمدە قويشى ءبارىن ويلامايىن،
ارمان تاۋ ارىلمادى- اۋ مۇنارىنان!
قابا اۋدانى سارتام اۋىلى شىعانشي قىستاعى
加载评论内容,请稍等......