جەڭىس تولەۋباي ۇلى
مەكتەپ قاقپاسى الدىندا
( اڭگىمە)
جەڭىل اۆتوكولىگىن مەكتەپ قاقپاسىنىڭ قارسى جاعىنداعى جولدىڭ شەتىنە توقتاتقان ول كولىگىنەنءتۇستى .
كۇن رايى بۇگىن دە سۋىتىپ، قازان ايىنىڭ جەلى قاقپاقىلداعان سارى جاپىراقتار قالقي بارىپ، ىقتاسىن جەرلەرگە ۇيلىعىپ جاتىر.
وڭىنان تۇرعان جەل كۇن كوزىن بۇلتتاتا قويعان. اۋانىڭ دىمقىلدانا قالعانىنا قاراعاندا سوڭعى كۇزدىڭ سوزىلىپ الاتىن جاۋىندى كۇندەرى دە تاياپ كەلە جاتقانداي...
مەكتەپ قاقپاسىنىڭ ماڭىندا بالالارىن توسقان اتا انالار جىپىرلاپ تۇر ەكەن . كەيبىرى اۆتوكولىگىمەن، كەيبىرى ەلەكتىرلى موتوسيكىلى، تەمىر اتتى، كەيى ون ءبىرىنشى كولىگىمەن( ەكى اياعىمەن) كەلگەن . توپ ىشىندە توقىما بورىگىن ميلىقتاتا كيگەن كارى شال كەمپىرلەردە بار. بۇرسەڭ قاعىپ، قاقپاعا تەلمىرۋدە.
الايدا ول سەكىلدى ساۋلەتتى كولىكپەن كەلگەندەرى كوپ ەمەس ەكەن، بولسادا قالىپتى باعاداعى جۇمىس كولىگى دەسەدە بولعانداي...
ماڭايىنا ماڭعازدانا قاراپ، الىستان مەڭگەرگىشىمەن ماشيناسىن كىلتتەدى دە، جول جاعاسىنداعى سەمونت ورىندىققا وتىرىپ تەمەكى تامىزدى .
جەل ۇيتقىتقان اق شۋلان ءتۇتىن بەت -اۋىزىن ارالاي بارىپ اۋاعا ءسىڭىپ جاتتى.
ءبىر ءتۇرلى تاكاپپار سەزىم تەپكىلەنە قالعان كوڭىلى ەشكىمدى ەلەر ەمەس.
ءبىر تەرىنىڭ اراسىندا مىڭ ارىپ، مىڭ سەمىرەتىن پەندە شىركىن قولى جەتە قالعاندا ايدىكتەنىپ، كەشەگىسىن ۇمىتىپ، كەلەشەگىن كەمەلدى ارمانمەن كەستەلەپ، «جەتە بەرسەم...جەتە بەرسەم...» دەپ جەلكەلەگەن اشقاراق قيالدىڭ سوڭىنان سالپاقتاي بەرەتىنى بار ەمەسپە.
ادەتتەگى ءبىر مەكەمەنىڭ ءبولىم باستىعى سىندى قالاقتاي ءمانسابىنىڭ بۋىنا توياتتاعان ونىڭ جۇرەك تۇكپىرىن تۇرتكىلەپ، ميىنا سەگنالىن جالعاپ سەمىرتىپ جۇرگەن جاسىرىن ارمانى دا بار بولاتىن. ۆەنيۋەرسيتەت بىتىرە سالىپ تالەيىنىڭ تاسىنا قاراي ورنالاسىپ قالعان قازىرگى قىزمەت ورنىن مەنسىنبەسەدە تىرناق ۇشى بولسادا ۇقىق ۇستاتىپ، ايىرىم كولىككە مىنگىزىپ قويعاسىن وسى ورىننىڭ قازىعىنا مىقتاپ بايلانىپ قالعان.
بۇل وپاسىز دۇنيەدە ارمانسىز پەندە بارما؟!
«ۇكىمەت قاراجاتىمەن قوناق كۇتپەۋ، ۇكىمەت ماشيناسىن جەكەلىككە پايدالانباۋ، سۋ باسىنان تۇنۋ» شىققاننان بەرى شاراسىز جەكە كولىك ساتىپ الىپ، مەكەمەدەگى قىزمەتكەرلەرىنەن وق بويى بيىكتىگىن ويسىراتپاۋعا تىرىسقان.
جەڭىل اۆتوكولىك العاننان بەرى ۇلى دا مەكتەپكە جاياۋ سالپاقتاعاندى قويدى، تاڭەرتەڭ بىرگە تۇرادى، ءتۇس، كەشتە قىزمەتتەن تۇسە سالىپ بالاسىن جولشىباي مەكتەبىنەن الا كەتەدى.
ۇلى وقىپ جاتقان بۇل مەكتەپ قالانىڭ باتىس تەرىستىك جاعىنا ورنالاسقان، اۋدان ورتالىعىنان نەداۋىر الىس بولىپ، كىرە كولىكتەرى دە سايابىر قاتىنايتىن ەدى.
ول مەكتەپ قاقپاسىنىڭ الدىنا بارعاندا ءوزىن باسقالاردان پارىقتى ەكەنىن بايقاعانداي توقمەيىلسىپ قالاتىن. بۇل زاماندا ساۋلەتتى سارايىڭ، ساۋلەتتى كولىگىڭ بار بولسا، وزگەدەن وقشاۋ كورىنەسىڭ. مىناۋ استا - توك قوعامنىڭ مىنەزى جۇققان ادامدار ىشىڭە ەمەس سىرتىڭا، مۇرنىڭا ەمەس مۇرتىڭا قارايتىن بولىپ العان.
بالاسى دا مەكتەپ قاقپاسىنان ەنتىگە شىعا كەلىپ:- اكە، ماشينا قايدا تۇر؟- دەپ سۇراۋدى ادەتىنە اينالدىرىپ العان. ول قالايدا ءبولىم باستىعىنىڭ ۇلى عوي،
شىرىن ويدىڭ شىرعاسىنا ءتۇسىپ كەتىپ ەدى، قاسىندا وتىرعان اق شاشتى الاسا كىسى:
- جىگىتىم ، سول قۇرعىرىڭدى تۇتاتپاي- اق قويساڭ بولاما، جەل وتىنە وتىرىپ العان ەكەنسىڭ، ءتۇتىنى مەنىڭ بەتىمە ۇرىلىپ تۇر، وكپەمدە سىرقات بار ەدى،- دەدى بەتىن قالقالاپ.
ونىڭ ار جاعىندا وتىرعان قارتاڭ ايەلدە قارتتىڭ ءسوزىن قوستاعانداي جاقتىرماعان الپەتپەن قاراپ قويدى. ولاردىڭ كوزىنشە الىستان مەڭگەرگىشتىڭ تەتىگىن باسىپ، «شيق» ەتكىزىپ، كولىگىنە قاراي جۇرگەن ول، «سول سۋىق سەمونت ورىندىققا سەندەر- اق ومالىپ وتىرىڭدار، وسىلار ءبىز قارتايتقانداي قوعامعا ءجونسىز ەركەلەگەندەرىن قويسا... ءساندى كولىگىمنىڭ ىشىندە، جىلۋ تەتىگىن قوسىپ، راحاتتانىپ وتىرىپ تەمەكىمدى تارتايىن» دەگەن مەن- مەنسىگەن سەزىمىن الشاڭ باسقان قادامىممەن ۇعىندىرعانداي بولدى.
كولىگىندەگى جۇمساق كوپشىككە قۇيرىعىن باسىپ وتىرا بەرگەنى سول ەدى، تەمەكى تارتقىزباي قۋىپ جىبەرگەن قارتاڭ كىسىنىڭ قاسىنا قايىرا تاراعان شاشىن جەل ۇيتقىتقان كوك كاستيۋم كيگەن ەڭسەگەي بويلى ەر ادام كەلىپ جايعاستى، ول جايراڭداپ قىرىس شالدىڭ قولىن قىسىپ امانداسىپ جاتتى.
- وي، مىناۋ ، الگى ۇزىن تۇرا لۋ دەرەكتور عوي.
وسى اۋدانداعى بايلاردىڭ الدىڭعى قاتارىندا تۇراتىن، نەشە رەت ولكە جاعىنان سيلانعان، قالاداعى ءىرى قۇرىلىستارعا قارجى قوسۋشى دوكەيمەن بۇل ءبىر رەتكى قوناعاسىدا بىرگە بولعانى بار. وندا دا داستارقانعا بىرگە جايعاسقان ەمەس، تەك اراق قۇيۋشى عانا سالاۋاتىمەن ونىڭ ۇرەمكەسىنە ەكى رەت شولمەك ەڭكەيتكەن.
ول اسىعىس- ۇسىگىس كولىگىنەن تۇسكەنشە مەكتەپتىڭ قاقپاسىنان وقۋشىلاردىڭ شۋىلداعان ءۇنى شىقتى دا، بارلىق اتا- انالار مەكتەپ قاقپاسىنا قاراي اعىلدى. لۋ دەرەكتوردە سولاردىڭ ىشىندە كەتتى.
لۋ دەرەكتوردىڭ قاراسىنان كوز جازىپ قالعان ول قۇجىناعان وقۋشىلاردىڭ ىشىنەن بالاسىن تاۋىپ الىپ، كولىككە وتىرعىزدى دا، كوشەنى بويلاي زىمىراي جونەلدى.
بالاسى تەرەزەدەن سىرتقى الەمگە تەلمىرە قاراپ وتىرىپ، سىنىپتاعى اڭگىمەلەرىن ايتىپ كەلەدى.
- اكە، ساباقتاسىم لۋ ۋيدى قارا،- دەدى ءبىر كەزدە بالاسى، تەرەزەنىڭ اينەگىن ءتۇسىرىپ باسىن شىعارا ايعاي سالدى
- لۋ ۋي.
ماشينا تەرەزەسىنە جابىسىپ تۇرعانداي، سۋىق جەل لاپ قويدى .
ول الدىداعى اينادان لۋ دەرەكتور مەن بالاسىنىڭ جاياۋ كەلە جاتقانىن كوردى،
«عاجاپ، بۇل كىسى بۇگىن نەگە جاياۋ ءجۇرىپ قالعان، ادەتتەگى مامىراجاي كۇن بولسا ءبىر ءسارى.»
ءبىر باسىنىڭ قاراماعىندا نەشە سەرىكتىك جۇمىس ىستەيتىن ءىرى قوجايىن مىنا جامان كولىگىنە تۇسە قوياما؟ لۋ دەرەكتوردىڭ شەتەلدەن كىرگەن نەشە ميلليون يۋاندىق قىمبات كولىككە ءمىنىپ جۇرگەنىن كورگەن.
«مۇندايلار كەيدە سيقىرسىپ، قاراپايىم بولىپ كورىنىپ، حالىققا اسەر قالتىرۋدى ويلايتىنى بار، نەمەسە الدىڭعى مۇيىستە..»
سوندا انا اقشالى اكۋلانىڭ بالاسى بۇنىڭ بالاسىمەن سىنىپتاس بولعانى ما؟
ول ايەلىن كىنالادى. اتا- انالار جيىنىنا سول بارادى، بالاسى قانداي ادامداردىڭ ۇرپاعىمەن بىرگە وقيدى؟ سول جاعىن باقىلاي جۇرسە بولماي ما؟ قوعامدى تۇسىنبەيتىن ادامدار بايلانىس ورايىنان وڭاي ايرىلىپ جاتادى، تاڭىر ءوزى بۇعان اۋدانداعى بەدەلدى جويتپەن تانىسۋعا كوپىر سالىپ بەرگەن ەكەن، «قاربىز» مي ايەلى سول كوپىردى بايقاماپتى. ەندى كولىگىن كولدەنەڭدەي قالسا وعان اتەيلەپ ءجون كورسەتكەندەي بولىپ قالماي ما!
- بالام ، تەرەزە اينەگىن كوتەرىپ قوي، اقشالىلار مەن ۇلىقتاردىڭ ءوزى تۇگىل بالاسىنا سويلەگەندە جۇمساقتىق كەرەك، انداعىڭ دورەكىلىك بولدى،- دەدى وزىنەن بيىكتىڭ بۇتىنان وتەتىن ادەتىن ۇمىتپاي.
- ولار جاياۋ كەلەدى،
- ۇيلەرى وسى ماڭايدا بولار.
- ولاردىڭ ءۇيى ءتورت كوشەدەن كەيىن،- دەپ بالاسى ورىندىققا شالقالاي جاتىپ الدىڭعى ماڭداي تۇسىنداعى اينادان اۋزىن بۇرتيتىپ، وعان قاباعىن تۇيە قارادى.
قوسالقى اينادان لۋ دەرەكتورمەن بالاسىنىڭ وڭىنان سوققان جەلمەن تىرمىسا ەگەسىپ كەلە جاتقان سۇلباسى الىستاپ بارىپ كىشى نوقاتقا اينالا بەردى.
- بالام، وكپەلەپ قالدىڭ با؟ ولاردىڭ وتىراتىن كولىگى الدىڭعى بۇرما جولدىڭ بىرىندە تۇرسا كەرەك. ارناۋلى شوفەرى بار.
- اكە، ولار ۇنەمى جاياۋ جۇرەدى. وتە ءبىر قاربالاس جاعداي بولماسا كىرە كولىگىنەدە وتىرعان ەمەس.
- سوندا اكەسى ۇنەمى كەلىپ، بالاسىن اكەتىپ تۇراما؟
- جوعا، كوبىندە ءبىر ايەل كەلەدى، ناعاشى اجەم دەيدى، ءبىراق ول كىسىنىڭ قيمىلى شيراقى، جۇرگەندە جاس ادامدارداي جەلەدى.
- نەدەيدى...بوران كۇنى دە جاياۋ سالپاقتاي ما؟
- قايسى كۇنگى قاتتى جاۋىندا دا لۋ ۋي قول شاتىرمەن كەلگەن، ول سوندا دا دارىستەن كەشىكپەيدى. مۇعالىم ونى ۇنەمى ماقتايدى.
- ە، اقشالى ادامنىڭ بالاسىن ءبارى ماقتايدى.
- اكە ولار اقشالى ما؟
مىنا سۇراق بالاسىنىڭ اۋزىنان رياسىز ايتىلعانىن ول سەزدى.
- ولار اقشامەن ارتىن سۇرتەدى دەسەم، ارتىق ايتقانىم ەمەس.
ول ءوزىنىڭ وسى تەڭەۋ سوزىنە ىشتەي ءماز بولىپ قالدى. دەسەدە لۋ دەرەكتور ەستىپ قوياتىنداي جۇرەگى لوبىپ، رول ۇستاعان ەكى قولىنا ءدىرىل جۇگىردى دە، ولاردىڭ الدە قاشان قاراسىن ءۇزىپ قالعانىن ەسىنە الىپ، تەرەڭ تىنىستادى.
- وندا لۋ ۋي نەگە ۇنەمى جاياۋ كەلەدى؟ جاياۋ قايتادى؟ ولار ءبىز سەكىلدى ءبىر كولىك ساتىپ السا بولماي ما؟
بالاسى كۇردەلى ءبىر فۇرمالانى شەشەتىندەي ويلانىپ قالدى، ماڭداي تۇسىنداعى اينادان بالاسىنا مەيىرلەنە قاراعان ول:
-وي، قاراۋ سول، ءوز بالاسىنان بايلىعىن اياپ، قايران قىمبات كولىكتەر،
كۇنگە كۇيىپ توزعان ولىكتەر،- دەپ مىرس ەتىپ كۇلىپ، لۋ دەرەكتوردى اجۋالاي كىنالادى دا. ماشينا قارقىنىن ۇدەتە ءتۇستى.
* * *
كۇندەر وسىلاي ءوز تارتىبمەن ءوتىپ جاتتى. بالاسىن مەكتەپكە اپارۋ، اكەلۋ ونىڭ ەكىنشى قىزمەت مىندەتىنە اينالىپ قالعان. ايەلى ەرەن بازاردا جۇمىس ىستەيدى. قاربالاستىقتان ۋاقىتى جوق.
بۇگىن ونىڭ قىزمەت ورنىندا شۇعىل جيىن اشىلىپ، سىرت جەرگە ونىمدەرىن تانىسترۋ ءۇشىن ساپارعا شىعاتىنى ۇقتىرىلدى. جيىن اياقتاي سالا قاتىستى جۇمىستاردى كومەكشىسىنە تاپسىرا سالىپ مەكتەپ قاقپاسىنىڭ الدىنا كەلسە، بالاسى ونى توسىپ، جول شەتىندەگى ورىندىقتا وتىر ەكەن.
قىس ايىنىڭ العاشقى لەبىن بايقاتقانداي تەرىسىنەن سوققان قاراشانىڭ جەلى ونىڭ ەكى بەتىن اياماي شىمشىعانى ءبىلىنىپ تۇر.
- اكە، نەگە اينالدىڭىز؟ - دەپ ونى تەرگەي جونەلدى،- ەلدىڭ بالالارى كەتىپ قالدى، توڭىپ كەتتىم.
- اسىقساڭ مەنى توسپاي كىرە كولىگىن جالداي سالساڭ بولمادى ما؟.
- شەشەم بەرگەن اقشامەن اتتىرعان بورمي ۇنتاعىن الىپ جەدىم.
- ارزان جەمەكتىك جەمە دەسەكتە ءتىل المايسىڭ ءا. بەت اۋزىڭدى ءسۇرت،
- ماشيناڭىز قايدا تۇر؟ سۋلياۋ دورباعا سالعان جەمەكتىكتەرىن قۇنىعا اساپ، شاشالا سويلەگەن بالاسىنا ول :
- ساقشىلاردىڭ قورعاۋ رايونىنىڭ سىرتىندا تۇر،- دەپ ەدى. اۋزىن تومپايتىپ ەركەلەگەن بەينەمەن،- نەگە تاياتىپ قويمادىڭىز، شارشاپ تۇرمىن،- دەدى بالاسى.
ماشينانىڭ جىلى قۇرساعىنا كىرىپ، جۇمساق كوپشىگىنە قۇيرىعى تيگەن بالاسى ەندى جادىراي قالىپ، سىنىپتارىنداعى قىزىقتارىن ايتا باستادى.
-اكە،- دەدى ول، بۋلانا قالعان اينەككە شيماي سالىپ وتىرىپ،- بىزدىڭ كلاستا مەنىمەن قوسقاندا ءۇش ساباقتاسىمنىڭ اكەسىندە عانا قىمبات كولىك بار..
بالاسنىڭ ونىڭ بولىمسىز ءمانسابى مەن قىمبات كولىگىن بەت قالقا ەتىپ باسقالارعا ايبارلاناتىنىن سەزگەندەي بولعان ول جىميىپ قويدى .
- بالام، اكەڭ ەرتەڭ قىزمەت سەبەبىنەن سىرتقا شىعاتىن بولدى.
مىنا ءسوزدى ەستىگەن بالاسى اكەسىنىڭ ورىندىعىنا جابىسىپ، جەلكە تۇسىنان ەركەلەي سويلەدى:
- وندا مەنى كىم مەكتەپكە اپارادى؟
- ءوزىڭ باراسىڭ؟
- وندا وقۋعا بارمايمىن. ول ماڭداي تۇسىنداعى اينادان بالاسىنىڭ شىنداپ وكپەلەگەن ءجۇزىن كوردى.
- و، حانزادام، اكەڭ باردا سەنى مەكتەپكە اپاراتىن كۇيمە تابىلادى، قىزمەتتەسىمە سەنى تاپسىرىپ قويعامىن، ءبىر نەشە كۇن سول اكەپ، اپارىپ تۇرادى. ونىڭ دا بالاسى سول مەكتەپتە وقيدى، ەندى الاڭسىز بولعان شىعارسىڭ..
- راحىمەت اكە، - بالاسى ونىڭ وڭ جاق بەتىنەن شوپ ەتكىزىپ ءسۇيدى دە ورنىنا جايعاستى. بەتىنە جايسىز ءبىر جابىسقاق نارسە شاپتالعانداي اسەردە بولعان ول وڭ جاق يىعىنا بەتىن سۇيكەپ قويدى. بالاسىنىڭ اتتىرىلعان بورمي ءدانىن ءالى جەپ وتىرعانىن سوندا ءبىلدى.
ءبىر كوشەدەن ءوتىپ ەكىنشى كوشەگە اۋىسقاندارىندا اينەككە ءوزى سالعان شەڭبەردەن سىعالاپ وتىرعان بالاسى:
- اكە، ساباقتاسىم لۋۋي كەتىپ بارادى، ماشينانى توقتاتىڭىز، وتىرعىزىپ الايىقشى، ونىڭ ءۇيى الىس ،- دەدى جالىنعان ۇنمەن..
ءبىر توپ بالا جاياۋلار جولىندا كەتىپ بارادى ەكەن.
ول ماشيناسىن كوشە شەتىندەگى سارى سىزىقتى رايونعا توقتاتتى.
قۇس ءجۇنى شاپانىن تاپ تۇيناقتاي ەتىپ تۇيمەلەپ، باسىنا قوڭىر بورىك كيگەن، ءجۇزى سۋىققا البىراي قالسادا، كوزىنەن قايسارلىعى مەن مۇندالاپ تۇرعان بالاعا، - سەن لۋ دەرەكتوردىڭ بالاسى بولارسىڭ؟،- دەدى كۇلىمسىرەي قاراپ.
- سالەمەتسىزبە اعاي، اكەمدى تانيسىز با؟- دەپ لۋ ۋي ەركەلەي سويلەدى.
-تانيمىن، ءبىر داستارقانداس بولعانمىن، سەن مەنىڭ ۇلىمنىڭ ساباقتاسى ەكەنسىڭ، ساباقتاستىق ءومىر ەڭ عانيبەتتى، ساعىنىشقا تاتيتىنءومىر، قانە، ماشيناعا شىق،
لۋ ۋي الدە بىردەڭەسى جوعالعان ادامداي وعان ءبىر ماشيناعا ءبىر قاراپ توسىرقاپ تۇرىپ قالدى.
-نەگە، شىقپاي تۇرسىڭ؟ بۇل كولىكتى مەنسىنبەي تۇرسىڭ با؟
- ولاي ەمەس اعاي،
لۋ ۋي قىسىلعانداي الپەتپەن كۇلدى. ول كۇلگەندە تومپاق بەتى كوتەرىلىپ، مويىن جىلتارىنىڭ ەرنەۋىنەن اق مارجان تىستەرى اقسيا كورىنەدى ەكەن. سونىڭ ءوزى بالاعا سۇيكىمدىلىك سيلاعانداي.
- الدە مەنى بالا ۇرىسى شىعار دەپ تۇرسىڭ با؟ قى..قى...
ماشينا ىشىندەگى بالاسى دا ،- شىقساڭشى، بول تەز، سۋىق كەۋلەپ كەتتى،- دەپ ايعالادى.
لۋ ۋي ماشينا ەسىگىن جاپتى دا، - كەشىرىڭىز اعاي ، مەن جاياۋ جۇرەيىن، ماشيناعا وتىرعانىمدى كورسە اكەم رەنجيدى ،- دەدى باسەڭ ۇنمەن،
- اكەڭ نەگە رەنجيدى؟- دەدى بۇل ونىڭ سوزىنە تاڭعالىپ.
- اكەم ماعان «سەن ماڭگى باي ادامنىڭ بالاسى ەمەسسىڭ، مەنى ماڭگى جان تورسىعىڭ ساناساڭ ، قۇستىڭ مەشەل بالاپانى قۇساپ قالاسىڭ»دەگەن،
- قۇستىڭ مەشەل بالاپانى، ول قانداي اڭگىمە؟
ول مىنا بالانىڭ ءتاتتى ءسوزىن قىزىق سەزىنگەندەي كۇلە سۇرادى.
لۋ ۋي وجەت ەكەن، ول مويىن جىلتارىنىڭ ەرنەۋىن تومەن سىرىپ، تەبىرەنە سويلەپ كەتتى:
- باياعى دا ءبىر قۇس انا بولىپتى، ونىڭ ەكى بالاپانى بار ەكەن، بالاپانىنىڭ ءبىرى ەلپەك، ەر جۇرەكتىلەۋ بولىپ، بىرەۋى الجۋازداۋ، مەشەل بولىپ ءوسىپتى. كۇندەر ءوتىپ، ولار ەسەيگەن سوڭ قۇس انا ەكەۋىن ۇشىپ، قونۋعا تاربيەلەپتى، ەر جۇرەكتەۋ وسكەن بالاپان ۇيا اينالاسىندا ۇشۋعا جاتتىعىپتى، تالاي رەت جەرگە قۇلاي جازداپ، اناسى قاناتىمەن توسىپ الىپ، جالعاستى كوك اسپانعا شىعارىپ، تاستاي سالادى ەكەن، مۇنى كورگەن قورقاق، مەشەل بالاپان اناسىنىڭ قاناتىنا جابىسىپ الىپ، تۇسپەي قويىپتى. قانشا سىلكىلەسەدە ،ءوز ەركىمەن ۇشپاي قويعان سوڭ قۇس انا ونى ارقاسىنا جابىستىرىپ الىپ، تاعى ءبىرىن ۇشىپ قونۋعا، ناسەكومدار مەن قاناتتى قۇرت اۋلاۋعا جاتتىقتىرا بەرىپتى.
كۇندەر وتە كەلە ەكى بالاپان ۇلكەن قۇسقا اينالىپتى، قۇس انادا قارتايىپ، كوز جۇمار الدىندا:
- سەندەردى قاناتتىعا قاقتىرماي، تۇمسىقتىعا شوقتىرماي تۇلەتتىم، ەندى ءوز ازىقتارىڭدى وزدەرىڭ تاۋىپ، جاندارىڭدى باعىڭدار،- دەپتى، داۋىل نوسەردەن تايىنباي، ۇشۋعا جاتتىعىپ قاناتتانعان بالاپان ايباتىنان جەل ەستىرىپ، كوك زەڭگىر اسپانعا سامعاپ شىعىپتى دا، بۇلت اراسىنا سۇڭگىپ كەتىپتى، ال قيىندىقتان قورقىپ قۇس اناعا عانا سەنىپ قالعان مەشەل بالاپان، توپ قانات بولىپ ۇيادان ۇزاي الماي اشتان ءولىپتى،-دەيدى
- سوندا وسى كىر ارزىماس ەرتەككە بولا كولىگىمە تۇسپەي تۇرسىڭ با؟
لۋ ۋي «مىنا ءسوزدى ءسىز ايتىپ تۇرسىزبا» دەگەندەي وعان تاڭعالۋ سەزىممەن قارادى دا :
- مەن مەشەل بالاپان بولعىم كەلمەيدى!- دەپ قولعابىن تارتىپ، ساۋساقتارىمەن ساۋساقتارىن ايقاستىرىپ، مويىن جىلتارىمەن بەت اۋىزىن سۋىق وتپەستەي قىمتاپ الدى دا، - ساۋ بولىڭىز اعاي،- دەپ جاياۋلار جولىنا ءتۇسىپ، جۇگىرە جونەلدى.
جەلگە قارسى قاسقايىپ، ۇزاي بەرگەن وعان اڭتارىلا قاراپ تۇرىپ قالعان بالاسى:
- اكە ، توڭىپ كەتتىم، ماشيناعا شىعىڭىزشى،- دەگەن ۇلىنا تۇڭعىش رەت دۇرسە قويا بەردى.
- ماشينا ىشىندە وتىرىپ سۋىققا توزە الماساڭ، قىس كەلگەندە قايتپەكسىڭ ؟!
سودان كوپ وتپەي ونىڭ ماشيناسىنىڭ ارتقى اينەگىنە «ماشينا ساتامىز» دەپ جازىلعان قاعاز شاپتالدى.
加载评论内容,请稍等......