ەرىكتى تىلشىلەر ۋاڭ ياپيڭ، بايسحنا
«قوجايىن، ماعان ءبىر كيلوگرام قۇرت، ءبىر كيلوگرام سۇزبە، ەكى قالبىر كىلەگەي بەرىڭىز». «جارايدى، باعاسى 260 يۋان». 7 - ايدىڭ 14 - كۇنى تۇستەن بۇرىن بۇراتالا قالاسى دىلگىر ازىق - تۇلىك ءوندىرۋ شەكتى سەرىكتەستىگىنىڭ جاۋاپتىسى ج. ءۇرىنجاپ الارماندارعا ءسۇت ونىمدەرىن ساتا ءجۇرىپ وسىلاي دەپ جاۋاپ قاتتى.
ول: بۇل ارادان ءسۇت ونىمدەرىن ساتىپ الاتىنداردىڭ ％80ى تۇراقتى الارماندار، كەيدە الارماندار قاربالاس بولسا، ۇيلەرىنە جەتكىزىپ بەرەمىن، - دەدى تىلشىگە.
بيىل 50 جاستاعى ج. ءۇرىنجاپ بۇراتالا قالاسى چىندىل كوشەسى شيۋيان الەۋمەتتىك اۋماعىنىڭ تۇرعىنى، ىلگەرى جىلدارى ول كۇيەۋىمەن بىرگە بۇراتالا قالاسىنىڭ ماڭايىندا ۋاقىتشا جۇمىس ىستەيتىن. ءبىر كەزدەيسوق ورايدا ج.ءۇرىنجاپ ىشكى موڭعۇل ەرەكشەلىگىندەگى ءداستۇرلى ءسۇت ونىمدەرىنىڭ سول وڭىردە ەرەكشە ءوتىمدى ەكەنىن بايقايدى. سونىمەن كۇيەۋىنىڭ قولداۋىندا ىشكى موڭعۇلعا بارىپ ءداستۇرلى ءسۇت ونىمدەرىن جاساۋدى ۇيرەنەدى.
قايتىپ كەلگەننەن كەيىن ج. ءۇرىنجاپ ءوز وتباسىندا ازداپ سۇزبە، سارى ماي، ىرىمشىك جاساپ، الدىمەن تۋىستارىنا، كورشى - قولاڭدارىنا ءدامىن تاتقىزادى. ويلاماعان جەردەن كورشى - قولاڭدارى مەن تۋىس - تۋعاندارى ونىڭ ءسۇت ونىمدەرىن تالاسا ساتىپ الىپ كەتەدى. كۇندەر وتە كەلە الارماندار كوبەيىپ، ونىڭ ءسۇت ونىمدەرى قىستاقتا تانىمالى بولا باستايدى.
2015 - جىلى 12 - ايدا بۇراتالا قالالىق ساياحات مەكەمەسىنىڭ، ادام كۇشى بايلىعى جانە قوعامدىق قامتاماسىزداندىرۋ مەكەمەسىنىڭ كومەگىندە، ج. ءۇرىنجاپتىڭ بۇراتالا قالاسىنداعى شارۋاشىلىق قۇرىپ، كاسىپ تۋىنداتۋ بازاسىنان تەگىن دۇكەن الۋ ءوتىنىشى بەكىتىلەدى، سونىمەن ول شارۋاشىلىق قۇرۋدىڭ جولىنا قادام تاستايدى.
ىلە - شالا، ج. ءۇرىنجاپ بۇراتالا قالالىق ادام كۇشى بايلىعى جانە قوعامدىق قامتاماسىزداندىرۋ مەكەمەسىنىڭ ۇيىمداستىرۋىندا ءۇرىمجى قالاسىنا بارىپ تيجارات شەبەرلىگىن ۇيرەنەدى. ج. ءۇرىنجاپ: بۇرىن ونىمدەرىمدى وزگەلەر ىزدەپ كەلىپ ساتىپ الاتىن، قازىر ءوز ونىمدەرىمدى ىرىقتىلىقپەن ساۋدالايتىن بولدىم، - دەدى.
2016 - جىلى 9 - ايدىڭ 2 - كۇنى، 2016 - جىلعى جۇڭگو دەنە تاربيە مادەنيەت كورمەسى، دەنە تاربيە ساياحات كورمەسى شينجياڭ حالىقارالىق كورمە ورتالىعىندا اشىلادى، ج. ءۇرىنجاپتىڭ ءسۇت ونىمدەرى بۇراتالا قالاسى اتىنان كورمەگە قاتىناسادى. سول رەتكى كورمەگە قاتىناسۋ ارقىلى ونىڭ كوز اياسى كەڭەيىپ، ءوز بويىنداعى پارىقتى تانيدى.
ج. ءۇرىنجاپ: مەن جاساعان سۇزبە، ىرىمشىك قاراپايىم سۋلياۋ دوربالارمەن قوراپتالعان بولاتىن، كورمەگە قويعانىمدا قوراپتالۋى قاراپايىم، مادەنيەت تىنىسى دا سولعىن بولىپ تۇردى، - دەدى.
قايتىپ كەلگەننەن كەيىن ج. ءۇرىنجاپ ءوز ونىمدەرىنىڭ ءدامى مەن قورابىن قايتكەندە جاقسارتۋ جونىندە باس قاتىرادى. ول: قۇرتتى قىشقىل جانە ءتاتتى ەتىپ جاساۋعا، سۇزبەنى ايتوقاش فورماسىندا جاساۋعا، سارى مايدى ادەمى اينەك قۇمىراعا سالىپ، سىرتىنا تانىستىرماسى بار ماركا جاپسىرۋعا بولادى...، - دەدى. ونىڭ تىنباي قۇلشىنۋىندا ءدامى ءتىل ۇيىرەتىن، قوراپتالۋى اسەم ءسۇت ونىمدەرى الارمانداردىڭ ءتىپتى دە قىزۋ قارسى الۋىنا بولەندى.
بۇل كۇندەرى ج. ءۇرىنجاپتىڭ ءسۇت ونىمدەرى العاشقى 4 تۇردەن 20داي تۇرگە كوبەيدى. الارماندارى دا العاشقى كورشى - قولاڭدارى مەن تۋىس - تۋعاندارىنان تۇتاس بۇراتالا قالاسى تۇرعىندارىنا كەڭەيدى.
«2017 - جىلى مەن بۇرتالا قالاسى سۋبۋد ءسۇت ونىمدەرىن مانەرلەۋ كاسىپتىك سەلبەستىك كووپەراتيۆىن قۇردىم، قازىرگە دەيىن 11 وتباسى كووپەراتيۆكە مۇشە بولدى. مۇنان كەيىن، ءبىز ءداستۇرلى ءسۇت ونىمدەرىن سان مىڭ وتباسىنىڭ داستارقانىنا شىعارامىز»، - دەيدى ج. ءۇرىنجاپ.
كەلۋ قاينارى : شينجياڭ گازەتىنەن
加载评论内容,请稍等......