فۋكاڭ قالاسى بوفىڭ ءمالىسى بوفىڭ الەۋمەتتىك اۋماعىنىڭ كادرى سوفيا ۋاحاپ

مەن ديقان وتباسىندا دۇنيەگە كەلدىم، اكەم قوسىننان شەگىنگەن اسكەر بولاتىن، جاۋىنگەرلىك ءومىرى ونىڭ ماڭگى ۇمىتىلماس كەشىرمەسىنە اينالعان، قوسىندا العان تاربيەسى اكەمنىڭ ومىرىندە ۇلكەن وزگەرىس تۋدىرىپتى، ول ءبىر جەتىم بالادان جاۋاپكەرشىلىك ارقالاي الاتىن ەر جىگىتكە اينالىپتى. اكەم ۇنەمى بىزگە: «بالالارىم، قازىر تۇرمىسىمىز جاقساردى دەپ تەگىمىزدى ۇمىتپاۋىمىز كەرەك، كوممۋنيستىك پارتيانىڭ باسشىلىعى بولماسا، ءبىزدىڭ باقىتتى، تولىقسىعان تۇرمىسىمىز بولماس ەدى»، - دەپ تاربيە بەرەتىن. اكەمنىڭ تاربيەسىمەن مەن كىشكەنتايىمنان پارتياعا ىلەسۋدىڭ بەرىك سەنىمىن ورناتىپ، بەلسەنە العا ۇمتىلىپ، باستاۋىش مەكتەپتە وقىعانىمدا العاشقى توپتا پيونەر بولدىم، ورتا مەكتەپتە وقىعانىمدا العاشقى توپتا كوممۋنيستىك جاستار وداعىنا قابىلداندىم، داشۋەدە العاشقى توپتا جۇڭگو كوممۋنيستىك پارتياسىنا مۇشە بولدىم، داشۋەنى بىتىرە سالىپ ەمتيحاننان ءوتىپ نەگىزگى ساتىعا بارىپ قىزمەت ىستەدىم. قىزمەتكە شىققاننان كەيىن، اكەم ماعان: «ەسىڭدە بولسىن، پارتيانىڭ الدىندا بەتىڭ جارىق بولاتىن ءىس ىستە، قاي - قاشان دا ءوزىڭنىڭ كوممۋنيستىك پارتيانىڭ مۇشەسى ەكەنىڭدى ۇمىتپا»، - دەدى. اكەمنىڭ قاراپايىم سوزدەرى مەنى العا باسۋعا جەبەيتىن قوزعاۋشى كۇش بولدى. ۇيرەنۋ مەن قىزمەت بارىسىندا مەن قاشاندا العاباسار ۇلگىلەردى ونەگە تۇتىپ، ولارعا قاراپ قاتار تۇزەدىم، ولاردان ۇيرەندىم، الەۋمەتتىك اۋماق قىزمەتىن شىن نيەتىممەن ويداعىداي ىستەپ، نەگىزگى ساتىداعى بۇقاراعا شىنايى قىزمەت ەتتىم. تاجىريبەلەردى قۇلشىنا ۇيرەنىپ، وزىمدەگى ارتىقشىلىقتاردى ساۋلەلەندىرىپ، الەۋمەتتىك اۋماقتىڭ ءتۇرلى قيمىلىنا قىزۋ ارالاستىم، بۇقاراعا بەلسەنە ۇگىت جۇرگىزىپ، پارتيانىڭ قامقورلىعىن، پارتيانىڭ حالىقتى بايىتۋ، حالىققا تيىمدىلىك جەتكىزۋ ساياساتتارىن، ورنىقتىلىق جاعدايىن، قوعامنىڭ دامۋ وزگەرىسىن، ۇلتتار ىنتىماعىن ۇگىتتەپ، ءار ۇلت بۇقاراسىنىڭ ىنتىماقتاسىپ، دوستاسىپ، شات - شادىمان ءوتۋىن جەبەدىم.

«ءۇش ءتۇرلى كۇش» زورلىقتى كۇش، لاڭكەستىك دەلولارىن جوسپارلاپ تۋدىرىپ، شينجياڭنىڭ تىنىش، ىنتىماقتى جاعدايىن ءبۇلدىرىپ، شينجياڭدى وتانىمىزدىڭ قۇشاعىنان ءبولىپ اكەتۋگە ۇرىندى. ولاردىڭ سۇرقيا ارەكەتتەرى شينجياڭداعى ءار ۇلت بۇقاراسىنىڭ ءومىرى مەن مال - مۇلكىنىڭ حاۋىپسىزدىگىنە اۋىر زيان سالىپ، ءار ۇلت بۇقاراسىنىڭ قالىپتى ءوندىرىس، تۇرمىس تارتىبىنە اۋىر ىقپال جەتكىزدى. شينجياڭنىڭ ىنتىماقتى، ورنىقتى اسا تاماشا جاعدايىن قورعاۋ − ءار ۇلت بۇقاراسىنىڭ باس تارتۋعا كەلمەيتىن جاۋاپكەرشىلىگى. سۇيىكتى ءار ۇلت باۋىرلاستارىم، انىقتاپ قاراڭىزدارشى، وتان انامىز ءبىزدى قۇشاعىنا الىپ قورعاپ، بىزگە پانا بولىپ، ءبىزدى باعىپ - قاعىپ ءوسىردى ەمەس پە. وتان انامىزدىڭ نازارىنان بىردە - ءبىر بالاسى قاعىس قالماق ەمەس، العا باسۋ جولىندا بىردە - بىرەۋى كەم بولسا بولمايدى. مەيلى ءبىز قايدا بولساق تا، وتان ءبىزدىڭ قامقورشىمىز، ءبىز قانداي باقىتتىمىز دەسەڭىزدەرشى! اڭ ەكەش اڭ دا، قۇس ەكەش قۇس تا انا قارىزىن وتەۋدى بىلەدى. پارتيا مەن مەملەكەتتىڭ شينجياڭعا قاراتقان ءتۇرلى ءتيىمدى ساياساتى، شينجياڭعا جاساعان قامقورلىعى، سۇيىسپەنشىلىگى بۇل مەكەندى كوركەيتتى، دامىتتى. ەندەشە، وتانىمىزدى، شينجياڭدى نەگە قىزۋ سۇيمەسكە؟

ۇگىت - يدەيا شەبىنىڭ قىزمەتكەرى، قوس ءتىلدى ۇگىت - لەكسياشى رەتىندە، مەن يىعىمداعى جاۋاپكەرشىلىكتىڭ اۋىر ەكەندىگىن تەرەڭ سەزىندىم، ءسوزسىز، مۇرات - سەنىمدى بەكەمدەپ، ساياسي ءتارتىپ پەن ساياسي قاعيدانى قاتايتامىن؛ ءسوزسىز، پارتياعا ادال بولىپ، تۇرعىمدى بەكەمدەپ، ساياسيدا قىراعى بولىپ، جاۋاپكەرشىلىكتى باتىل ارقالايمىن؛ ءسوزسىز، بولشەكتەۋشىلىككە قارسى تۇرۋ كۇرەسىندە تانىمدا ءدۇدامال بولمايمىن، پوزيتسيادا كۇڭگىرتتىككە سالىنبايمىن، ارەكەتتە سولقىلداقتىق ىستەمەيمىن، ۇگىت - تاربيە قىزمەتىن تىڭعىلىقتى تۇردە ويداعىداي اتقارامىن. ءار ۇلت بۇقاراسىنا پارتيانىڭ لۋشيان، باعىت - ساياساتتارىن، مەملەكەتتىڭ زاڭدارىن، زاڭ - ەرەجەلەرىن ۇگىتتەيمىن، ۇلتتار ىنتىماعى جانە «ۇشقارىلىقتى الاستاۋ» قىزمەتىن جاقسى ىستەيمىن، «ەكىبەتكەيلەردى» باتىل اشكەرەلەيمىن، سىن تەزىنە الامىن، استە «ماقۇلباي» بولمايمىن، يدەيا - ۇگىت شەبىندەگى پارتيالى كادردىڭ ونەگەلىك رولىن جاقسى ساۋلەلەندىرىپ، ورنىقتىلىقتى قورعاۋدىڭ ىلگەرىلەتۋشىسى، اتقارۋشىسى بولامىن.

 كەلۋ قاينارى : شينجياڭ گازەتىنەن